Bandixonliklar shukronasi
Bandixonliklar qadimdan chorvachilik, bog'dorchilik, dehqonchilik hadisini puxta egallashgan. Ammo, bitta lekini bor: suv masalasi chatoq. Salkam ekin maydonlarining 80 foizi ko'tarma nasoslar orqali sug'oriladi. Qurg'oqchilik kelib, suv taqchil bo'lgan yillari daromaddan xarajat ortiq bo'ladi. Bandixon muzofotidagi qishloq xonadonlari ichimlik suvini sotib olishadi, imkoni borlari juda uzoqlardan tashib ichishadi. Tuman tugatilgach, shunday katta hudud oddiy xo'jalik maqomiga tushib qoldi. Aholining madaniy turmush sharoiti va qishloqlar infratuzilmasi yildan yilga og'irlashib borardi.
Har qanday muammoning yechimi keladigan o'z vaqti bo'larkan. Muhtaram Prezidentimizning tashabbuslari bilan 2019 yilda Bandixon tumani qayta tashkil etilib, asosiy e'tibor qishloq va qo'rg'onlarni obodonlashtirish, fuqarolarning hayot tarzini har tomonlama yaxshilashga qaratildi. Qisqa vaqtda yangi maktablar, qishloq vrachlik puntlari, oilaviy poliklinikalar, bolalar bog'chalari, savdo, maishiy xizmat nuqtalari bunyod etildi. Uzoq qishloqlardagi texnika tugul odam yurishga qiynaladigan ichki yo'llar tekislanib, tosh to'kildi. Mavjud ijtimoiy binolar va inshootlar holati o'rganilib, joriy hamda mukammal ta'mirdan chiqarildi. Bandixon qo'rg'onidagi mahallalar yo'llariga beton yotqizildi. Tuman ahli uchun toza ichimlik suv quvuri tortildi. Zamonaviy xiyobonlar, piyodalar yo'laklari qurildi. Xullas, uch yilda Bandixondagi qishloqlar va qo'rg'onlar zamonaviy hamda jozibali qiyofa kasb etdi.
Tuman markazidan o'tuvchi tor va o'nqir- cho'nqir yo'lga 21,6 milliard so'm mablag' sarflanib, bugungi talablarga to'liq javob beradigan to'rt qatorli zamonaviy avtomobil yo'li bunyod etildi. Tuman hokimligining uch qavatli ma'muriy binosi qurib foydalanishga topshirildi. Eng muhimi, tuman markazidagi “Bandixon”, “Bektepa”, “Saroy” mahallalarida istiqomat qiluvchi 1500 xonadon hovlisi va tomorqasiga oqar suv keladigan bo'ldi. Yana bir yangilik: fermer xo'jaliklariga qarashli 1600 gektar ekin maydonini endilikda bemalol sug'orish imkoniyati yaratildi. “Oqqapchig'ay” kanalidan suv oluvchi R-1 anhorining 8,6 kilometri irrigatsiya inshootlari bilan birgalikda 6 milliard so'm mablag' evaziga qayta ta'mirlanib, ekin maydonlariga baraka yog'dirildi. Xullas, Tumanning “Zevar”, “Obod turmush”, “Birdamlik” kabi mahallalarida barcha jabhalarda qurilish obodonlashtirish, ko'kalamzorlashtirish ishlari ko'tarinki ruhda olib borilmoqda.
Yangi yil arafasida bandixonliklar foydalanishga topshirilgan yangi binolar, zamonaviy yo'l va yo'laklar, maktab va bog'chalar bahonasida bayram tadbiri uyushtirishdi. Quruvchi va bunyodkorlarga to'nlar kiygizilib, sovg'alar ulashildi. Yurtimizdagi farovonlik, tinchlik-osoyishtalik, ulkan bunyodkorlik shukronasiga jonliq so'yilib, Qur'on tilovat qilindi. To'g'risi, elim, yurtim deb mehnat qilayotgan xalqqa tadbir ham, bayram ham, to'y ham juda-juda yarashadi…
Safar OMON,
“Hurriyat” muxbiri.