Maqsad — malakali mutaxassislar tayyorlash

Abu Ali ibn Sino nomidagi Buxoro davlat tibbiyot instituti o'tgan yilgi ta'lim natijalariga muvofiq, O'zbekiston Respublikasi Oliy ta'lim muassasalari milliy reytingida kuchli beshlikdan o'rin egalladi. Ayni kunda mazkur reytingdan izchil yuqorilash maqsad qilingan. Buning uchun tibbiyot sohasidagi ta'limning barcha jabhasida samarali faoliyat yuritish taqozo qilinmoqda.

Birgina institutimizning o'tgan yil davomida xalqaro hamkorlik borasida amalga oshirgan ishlariga nazar solsak, qator yangilanish va xorijiy hamkasblar bilan uzviy aloqalar yo'lga qo'yilganini ko'rish mumkin. Zero, bugun institut ta'lim sifatini yanada yaxshilash, mamlakatda ro'yobga chiqarilayotgan keng qamrovli islohotlarda faol ishtirok etayotgan zamonaviy kampusga ega yetakchi tibbiy oliy ta'lim muassasasi hisoblanadi.

Ta'kidlash joizki, institutning xalqaro hamkorligi ta'lim va ilmiy-tadqiqot sohasida o'zaro aloqalarni rivojlantirish, talabalarni xorijiy universitetlarga o'qishga yuborish va xorijlik professor-o'qituvchilar bilan birgalikda tadqiqotlar olib borishga asoslangan. Shu nuqtai nazardan, 2023 yilda xorijiy hamkorlar bilan o'zaro ilmiy-amaliy faoliyatga doir taj­riba almashish bo'yicha AQSh, Rossiya, Xitoy, Belarus, Hindiston, Janubiy Koreya, Turkiya, Malayziya va boshqa qator davlatlar o'rtasidagi aloqalarni e'tirof etish mumkin. Ayni kunda dunyoning 40 dan ortiq oliy ta'lim dargohlari, universitet, klinika va tashkilotlari bilan o'zaro memorandum va shartnomalar imzolangan. O'tgan yil davomida tibbiyot institutiga 170 ta xorijiy oliy ta'lim muassasasi professor-o'qituvchilari, tibbiyot klinikalari, ilmiy markazlar yuqori malakali mutaxassislari dars jarayonlariga jalb etilgan bo'lib, pirovardida bu ta'lim sifatini oshirishga, malakali mutaxassislar tayyorlashga xizmat qiladi.

Bugunga kelib institutning 191 nafar professor-o'qituvchisi va 90 nafar talabasi — ayni paytda magistratura va klinik ordinatura rezidentlari, doktorantlar xorijiy oliy ta'lim dargohlarida, tibbiyot klinikalari va ilmiy markazlarida akademik mobillik dasturi doirasida ma'ruza darslarini o'tish, turli loyihalar, ilmiy-amaliy anjumanlar, olimpiadalarda ishtirok etish maqsadida xizmat safarida bo'lib, xorijiy hamkasblardan tibbiy davo muolajalariga doir tajriba o'rganib qaytdi.

Jumladan, Italiyaning “Luigi Vanvitelli” universiteti, Hindistonning “GD Goenka” universiteti, Turkiyaning Sog'liq bilimlari universiteti, Polshaning “Wyższa Szkoła Biznesu — National Louis” universiteti, shuningdek, Rossiya Federatsiyasining N.I. Pirogov nomidagi milliy tadqiqot tibbiyot universiteti, Dog'iston davlat tibbiyot universiteti, Petrozavodsk davlat universiteti, Sankt-Peterburg davlat pediatriya tibbiyot universiteti, Kursk davlat tibbiyot universiteti, Qozon federal universiteti, Orenburg davlat tibbiyot universiteti, Kuban davlat tibbiyot universiteti, Qozog'istonning Janubiy Qozog'iston tibbiyot akademiyasi, Boltiq federal universiteti kabi nufuzli ta'lim maskanlari bilan qo'shma ta'lim dasturlari asosida hamkorlik faoliyatini olib bormoqda. Bu tizimda jami qo'shma ta'lim dasturlari asosida ta'lim olayotgan talabalar soni ayni kunda 897 nafarga yetgan bo'lib, shundan 181 nafari xorijiy hamkor oliy ta'lim o'choqlarida o'qishni davom ettirmoqda.

Abu Ali ibn Sino nomidagi Buxoro davlat tibbiyot institutida bugunga kelib bitiruvchilar bilan birga 16 ta xorijiy davlatdan jami 1 ming 500 nafardan ortiq talaba davolash ishi, stomatologiya va boshqa ta'lim yo'nalishlarida tahsil olish imkoniyatiga ega.

Xalqaro hamkorlik aloqalari ayni kunda ham ravnaq topmoqda. Jumladan, joriy yil boshidan Janubiy Koreyaning “Daegu Haany” universiteti bilan hamkorlikda “King Sejong”, ya'ni “Qirol Sejong” institutining Koreys tili markazini Buxoro davlat tibbiyot institutida ochish hamda xalq tabobatiga asoslangan farmatsevtik klasterni tashkil etish bo'yicha amaliy sa'y-harakat boshlangan. Shuningdek, institutimizning “Jo'yzar tibbiyot markazi”da hududiy reabilitatsiya markazini tashkil etishga qaror qilindi. Institutning yangi tashkil etilgan hududida esa tibbiy yadro markazini tashkil etish bo'yicha amaliy ish allaqachon start olgan.

Xalqaro hamkorlik loyihalari natijasi o'laroq, tibbiyot institutining akademik mobillik doirasida qabul qilinadigan va yuboriladigan professor-o'qituvchilari va talabalari soni 2023 yilga nisbatan 25 foizga oshirilishi ko'zda tutilmoqda. Bu borada olib borilayotgan chora-tadbirlar samarasida oliy ta'lim dargohida tahsil olayotgan xorijiy talabalar geografiyasi va qamrovini o'tgan 2023 yilga nisbatan 50 foizga, sonini esa 20 foizga oshirish maqsad qilingan.

Eng muhimi, olib borilgan tizimli ishlar natijasida quyidagi yutuqlarga erishildi.

“Yangi O'zbekiston — yangi dunyoqarash” shiori ostida “Ma'rifat maydoni” respublika tanlovida hamda “Munozara” intellektual turniri viloyat bosqichida talabalarimiz 1-o'rinni egalladi.

Ayni paytda institutimizda 500 nafar ijtimoiy himoya va ta'minotga ehtiyojmand talabalar bor. Shundan Mehribonlik uyi tarbiyalanuvchilari 9 nafarni tashkil qiladi, barcha yoshlar bilan ishlash, ularga moddiy va ma'naviy ko'maklashish bo'yicha institut tomonidan tizimli chora-tadbirlar ishlab chiqilgan. Institut kasaba uyushmasi, qolaversa, bu yo'nalishdagi yoshlarga mas'ul viloyat hokimligi, viloyatdagi 5 ta sektor, yoshlar ishlari agentligi viloyat bosh­qarmasi hamda mahalla va boshqa hamkor tashkilotlar bilan birgalikda har bir yosh bilan individual ishlar olib borilmoqda. Jumladan, o'tgan o'quv yilida institut kasaba uyushmasi tomonidan ehtiyojmand talabalarimizga umumiy hisobda jami 243 million so'mlik moddiy yordam berildi. Bundan tashqari, talabalarni har tomonlama moddiy qo'llab-quvvatlash maqsadida ularga ijara shartnomasi asosida davlat byudjeti tomonidan yil davomida 1 milliard 336 million so'mlik ijara to'lovlari to'lab berildi.

Prezidentimiz tashabbusi bilan joylardagi muammoli yoshlar: ishsiz, nogironligi bo'lgan, ijtimoiy himoyaga muhtoj yoshlardan 38 nafari shaxsan kaminaga – rektorga biriktirilgan bo'lib, tuzilgan ishchi guruh tomonidan ularning masala va muammolari muntazam o'rganib boriladi. Tegishli mas­'ul tashkilotlar bilan hamkorlikda bu muammolarning o'z vaqtida yechimini topishga ko'maklashiladi.

Nufuzli xorijiy oliy ta'lim muassasalarining ilg'or tajribasi asosida yoshlarga sifatli ta'lim berish, kasb-hunarga o'qitish va bo'sh vaqtini to'g'ri tashkil qilish bo'yicha alohida chora-tadbir ishlab chiqildi va bu borada raqamlashtirilgan yangi tartib, ya'ni baholashning KPI tizimi yo'lga qo'yildi.

Mamlakatimizning qadimiy va boy tarixini o'rganish, yoshlar orasida keng targ'ib etish, shuningdek, ularda milliy g'urur va iftixor tuyg'usini mustahkamlash maqsadida yurtimizdagi tarixiy obidalar, buyuk ajdodlarimiz nomlari bilan bog'liq muqaddas ziyoratgohlarga sayohat uyushtirish maqsadida guruh murabbiylari tomonidan ekskursiya – sayohat tadbirlari ham tashkil etilib boriladi.

Jumladan, talaba-yoshlar ma'naviyatini yuksaltirish yo'nalishida muzey, teatr va kinolarga borish va “O'zbekiston bo'ylab sayo­hat qil” shiori ostida joriy yil davomida Chashmai Ayyub maqbarasi, Ulug'bek madra­sasi, Ark, Chor-Minor, Labi Hovuz majmualari, Sitorai Mohi Xosa saroyi va Bahouddin Naqshband ziyoratgohi, Nodir devonbegi madrasasi, Minorai Kalon, shuningdek, Ko'hna va boqiy Buxoro yodgorligi, “Ark” viloyat o'lkashunoslik muzeyi, Fayzulla Xo'jayev uy-muzeyiga 3000 ga yaqin talabaning sayohati uyushtirildi.

Bundan tashqari, institutimizda Davlatimiz rahbari ilgari surgan besh muhim tashabbusni keng joriy etish maqsadida 18 ta to'garak tashkil etilgan. Birinchi tashabbus — yoshlarning musiqa, rassomlik, adabiyot, teatr va san'atning boshqa turlariga qiziqishini oshirish, iste'dodini yuzaga chiqarish maqsadida Yoshlar ittifoqi boshlang'ich tashkiloti va talabalar turar-joyi musiqa anjomlari bilan jihozlanib, “Talaba-yoshlar musiqa va san'at to'garagi” tashkil etildi. Shuningdek, 8 ta “Talabalar teatr studiyasi”, 5 ta “Quvnoqlar va zukkolar” klubi hamda 3 ta “Havaskorlik ansambli” guruhi faoliyati yo'lga qo'yildi.

“Talabalar teatr studiyasi” klublari tomonidan oliy ta'lim muassasalarida 30 ta, mahallalarda 15 ta, maktablarda 30 ta va boshqa muassasalarda 10 ta — jami 85 ta spektakl namoyish etildi. “Quvnoqlar va zukkolar” klublari tomonidan 48 marotaba musobaqa va chiqishlar tashkil etilib, shundan, 80 tasi guruhlar, 20 tasi fakultetlar, 10 tasi oliy ta'lim muassasalari o'rtasida o'tkazilgan. Shuningdek, 14 ta maktabda va 7 ta mahallada hamda 6 ta turli tadbirlar doirasida chiqishlar amalga oshirildi. Shu bilan birga, oliy ta'lim muassasasida o'tkazilgan turli mavzudagi tadbirlarda “Havaskorlik ansambli” guruhi tomonidan chiqish­lar uyushtirildi.

Institutda “Tafakkur sinovlari”, “Avitsenna” teatr studiyasi, “Kitobxonlar”, “Orasta qizlar”, “Quvnoqlar va zukkolar”, “Yosh havaskorlar” ijodiy to'garaklari tashkil etilgan, ularga jalb etilgan talabalar o'zlarining iqtidor va iste'dodlarini ins­titut hamda viloyat tadbirlarida namoyish etib kelmoqda.

Ta'lim maskanimizning ma'naviyat va ma'rifat xonasida O'zbekiston Respublikasi Prezidenti tomonidan ilgari surilgan 5 muhim tashabbusning birinchi yo'nalishi yoshlarning musiqa, rassomlik, adabiyot, teatr va san'atning boshqa turlariga qiziqish­larini oshirish, iste'dodini yuzaga chiqarish maqsadida “Tibbiyot yulduzlari” nomli ansambl tashkil etilgan.

Bugungi kunda ansambl o'z faoliyatini olib borishi uchun barcha musiqa asboblari bilan ta'minlangan. Ansamblda har bir fakultetdan 10 nafardan iste'dodli, qiziquvchi talabalar o'zlarining qiziqishi doirasida jalb etilgan bo'lib, institutda o'tkaziladigan ma'naviy-ma'rifiy tadbirlarda doimo ishtirok etadi.

Bir so'z bilan aytganda, olib borilayotgan barcha sa'y-harakatlardan asosiy maqsad — mamlakatimizda amalga oshirilayotgan keng ko'lamli islohotlarda xalqning, ayniqsa, yoshlarning faol ishtirokini ta'minlash, yuksak ma'naviyatli mustaqil va erkin fikr­laydigan sog'lom, bilimli avlodni voyaga yetkazishga qaratilgan ezgu vazifani izchil amalga oshirishdan iborat. Eng muhimi esa institutni tamomlab, qo'liga diplom olgan yoshlar – salohiyatli kadrlar bo'lib yetishsin. Chunki tibbiyot sohasi odamlarning dardi, kasalligi bilan kurashadigan, kerak bo'lsa, Alloh bergan dardni xalos etishda, umriga umr ato etishda bir vositachi bo'lishlari kerak bo'ladi.

To'g'ri, inson umri – Allohdan. Lekin xastalikka uchragan bemorga shifo baxsh etish uchun kurashmoq, sog'lom turmush tarzini targ'ibot qilish yo'lida ishda, shaxsiy hayotda ham namuna bo'lish talab etiladi. Buning uchun esa institutimiz professor-o'qituvchilari, butun jamoasi bilan bir yoqadan bosh chiqarib mehnat qilish, yoshlarga munosib bilim, tajriba berish mas'uliyati zimmamizdadir.

Shuhrat TEShAYEV,

Abu Ali ibn Sino nomidagi Buxoro

davlat tibbiyot instituti rektori.

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

sixteen − 12 =