O'zbekiston mintaqaviy sheriklikni izchil mustahkamlamoqda
O'zbekiston Prezidenti Shavkat Mirziyoyev amaliy tashrif bilan Rossiyaning Sankt-Peterburg shahrida bo'ladi.
25-26 dekabr kunlari tashrif doirasida mamlakatimiz yetakchisi MDHga a'zo davlatlar rahbarlarining norasmiy sammiti va Oliy Yevroosiyo iqtisodiy kengashining (EOIK) navbatdagi yig'ilishida ishtirok etadi.
Davlatimiz rahbari har yili MDHning an'anaviy sammitlarida ishtirok etib, O'zbekiston Hamdo'stlik maqsad va vazifalariga sodiqligini namoyish qilmoqda. Bunday formatlarda ishtirok etish respublikaga yaqin sheriklar bilan faol hamkorlik qilish, kun tartibidagi dolzarb masalalarni birgalikda muhokama qilish va o'zaro munosabatlarni yanada rivojlantirishga qaratilgan takliflarni ilgari surish imkonini beryapti.
O'zbekiston ishtirokchi davlatlar o'rtasidagi hamkorlikni mustahkamlashga salmoqli hissa qo'shish orqali MDH doirasida faol pozitsiyani egallab kelmoqda. Mamlakatimiz iqtisodiy, madaniy-gumanitar aloqalarni rivojlantirishga qaratilgan muhim tashabbuslarni muntazam ilgari surib kelayotir. O'zbekistonning MDH doirasidagi ustuvor yo'nalishlari qatoriga integratsiyani chuqurlashtirish, qo'shma loyihalarni ilgari surish va mintaqada barqarorlikni ta'minlash kiradi.
O'zbekiston uchun MDHdagi hamkorlar bilan savdo-iqtisodiy sheriklik muhim o'rin tutadi. Respublika eksport-import munosabatlarini faol rivojlanib, milliy mahsulotlarni sotish bozorini kengaytirmoqda, mintaqaning transport-logistika infratuzilmasini yaxshilashga qaratilgan loyihalarda ham faol ishtirok etmoqda. MDH davlatlari bilan o'zaro manfaatli hamkorlik aholi farovonligi darajasini oshirishga hamda O'zbekistonning ishonchli sherik sifatidagi mavqeini mustahkamlashga muhim omil bo'layapti.
O'zbekistonning MDH bilan aloqalari respublikaning Yevroosiyo iqtisodiy ittifoqi (EOII) bilan hamkorligi bilan chambarchas bog'liq.
Evroosiyo iqtisodiy ittifoqi Bojxona ittifoqi va Yagona iqtisodiy makon negizida tuzilgan xalqaro integratsion iqtisodiy birlashmadir. Ittifoq 2014 yil 29 mayda Ostona shahrida (Qozog'iston) Belarus, Qozog'iston va Rossiya davlat rahbarlari tomonidan imzolangan Yevroosiyo iqtisodiy ittifoqi to'g'risidagi shartnoma kuchga kirganidan so'ng 2015 yil 1 yanvardan ish boshladi. 2015 yilda Armaniston va Qirg'iziston shartnomaga qo'shildi.
O'zbekiston 2020 yilda YeOIIda kuzatuvchi davlat maqomini olgan. Kuba va Moldova ham YeOIIda xuddi shunday maqomga ega.
Birlashma nizomiga ko'ra, kuzatuvchi maqomiga ega davlatlar YeOII organlari yig'ilishlarida qaror qabul qilish huquqisiz ishtirok etishi, shuningdek, Yevroosiyo iqtisodiy komissiyasiga mamlakat vakilini tayinlashi mumkin.
O'zbekistonning YeOII bilan hamkorligini ushbu formatda rivojlantirish milliy manfaatlarga javob beradi va teng huquqlilik, shuningdek, ishtirokchi davlatlar tomonidan bir-birining manfaatlarini hisobga olish tamoyillariga asoslanadi.
O'zbekiston Prezidenti mamlakatimiz kuzatuvchi maqomini olganidan beri mazkur birlashma Oliy Kengashining oltita yig'ilishida qatnashdi.
O'zbekiston Bosh vaziri boshchiligida YeOII mamlakatlari va Yevroosiyo iqtisodiy komissiyasi bilan hamkorlik bo'yicha idoralararo ishchi guruhi tuzilgan. Ishchi guruh YeOII bilan o'zaro hamkorlikni muvofiqlashtiradi, iqtisodiy aloqalarni tahlil qiladi va hamkorlikni chuqurlashtirish bo'yicha takliflar ishlab chiqadi.
2024 yil 1 oktyabrda O'zbekiston hukumati va Yevroosiyo iqtisodiy komissiyasi o'rtasida 2024-2026 yillarga mo'ljallangan Qo'shma harakatlar rejasi imzolandi.
EOII platformasida kuzatuvchi davlat sifatida ishtiroki orqali O'zbekiston muhim tashabbuslarni ilgari surmoqda. Ittifoqqa a'zo barcha davlatlar bilan faol hamkorlik qilyapti, shuningdek, savdo-iqtisodiy va investitsiyaviy hamkorlikni rivojlantirmoqda. Ushbu omillar esa barqaror o'sish sur'atlarini ko'rsatayotir.
Muxtasar aytganda, O'zbekiston Prezidentining Sankt-Peterburg shahrida bo'lib o'tadigan MDH va YeOII sammitlarida ishtirok etishi, o'zaro manfaatli aloqalarni kengaytirishga yangi sur'at bag'ishlash barobarida, Hamdo'stlik va birlashma makonidagi davlatlar hamda xalqlar o'rtasidagi do'stlik rishtalarini mustahkamlash yo'lidagi yana bir amaliy qadam bo'lib xizmat qiladi.
“Dunyo” AA