Chertim

Aytilmagan haq so'zdek

Chertilmagan torlar bor.

Amirqul Po'lkan

She'r olami bepoyon,

Buyuk tog'lar, qirlar bor.

Dengiz kabi dostonlar,

Daryo kabi jirlar  bor.

 

So'z — urug', ko'ngillar — yer,

Hikmat sochib, to'kar ter,

Xirmoni cho'ng Alisher

Navoiydek zo'rlar bor.

 

Bog'da ochilar gullar,

Yashnab ketar ko'ngillar,

Fozil Yo'ldosh, Bulbullar ,

Po'lkan shoir — pirlar bor.

 

Odam yaxshi so'zga qul,

She'r aytsang, el tutar gul,

She'r qoldirdi Amirqul ,

Kitobida nurlar bor.

 

Shoirlar kuylar mohir,

Elga baxsh etar mehr,

Sozlarida bor sehr,

So'zlarida sirlar bor.

 

So'zdan yaralgan dunyo,

Dilda ishq, so'zda safo,

She'rda ganj bor bebaho,

Ketmas davlat, zarlar bor.

 

Doim zo'r she'r sayladim,

Doim zo'r she'r kuyladim,

Barchani lol ayladim,

Tinglolmagan “kar”lar bor.

 

Sichqon — mush, arslon — asad,

Yaxshi-yomon bor abad,

Shoirga qilib hasad,

Ko'rolmagan “ko'r”lar bor.

 

Haqqa aytib dil rozing,

Yangrataver sho'x sozing,

Xudo bergan ovozing

Olqishlagan yorlar bor.

26.01.2025

 

Rustam MUSURMON,

O'zbekistonda xizmat ko'rsatgan

madaniyat xodimi,

Qoraqalpog'iston xalq shoiri

Yangiliklarni do'stlaringizga ulashing

Fikr bildirish

Email manzilingiz chop etilmaydi. Majburiy bandlar * bilan belgilangan

four × 5 =