Ayol yig'lamasin!

Sayyora SAMANDAR,

O'zbekiston Yozuvchilar

uyushmasi a'zosi.

Ayol yig'lamasin!

Uning ko'z yoshi

Olamni aylagay girdobida g'arq.

Ayol yig'lamasin!

Uning ko'nglida

Umid daraxtlari yozaversin barg.

Ayol yig'lamasin!

Ko'zlari kulsin,

Yo'lidan adashsin ul devona dard.

Tillodan yaralgan ostonasini

Har kuni bir bora yo'qlab borsin baxt!

Ayol yig'lamasin!

Baxtlarga to'lsin,

Ko'ngliga qo'nmasin zarra g'ubor, gard.

Yonida yelkasin tutar tog' bo'lsin,

Topilsin ko'zlarin artib qo'yar mard!

* * *

To bahor yetguncha senga

Men bahor bo'ldim, elim.

Yangi tong otguncha toki

Xush nahor bo'ldim, elim.

Maysa bo'ldi kiprigim, oh,

Hol so'rab, berdim ko'ngul.

Sen agar yor istadingki,

Men shu yor bo'ldim, elim.

Qor-qirovda yuzlaringga

Yuz qo'yib, bo'ldim madad.

Lola gullar vasligakim

Chin xumor bo'ldim, elim.

Sen so'ra holimni endi,

Endi sen ko'nglumni ol.

Ham kuz-u ham qish ichinda

Misli xor bo'ldim, elim.

Barg yozib bog'u chamanlar

Barq urib ochgay chiroy.

Toki yaproq yozgunicha

G'amga dor bo'ldim, elim.

Men sening qoshingda bo'ldim,

Endi sen qoshimda qol.

Xush iforing bo'ylaridan

Baxtiyor bo'ldim, elim.

Olam ichra keldi ko'klam,

Qolmadi hech ish manga.

Ahli oshiq yona ketdim,

Ishqqa zor bo'ldim, elim!

To bahor yetguncha senga,

Men bahor bo'ldim, elim…