Yuragi to'xtab qolgan bemor
Uning hayoti Yaratganning inoyati va surxondaryolik shifokorlarning
mahorati tufayli saqlab qolindi
Mamlakatimizning eng chekka hududlaridan bo'lgan Termiz shahrida 2006 yilda viloyat kordiologiya markazi tashkil etilganda odamlarning quvonchi cheksiz bo'lgani bejiz emas edi. Chunki yurak va yurak qon-tomir kasalligidan aziyat chekayotgan bemorlar poytaxtga yoki boshqa uzoq yurtlarga borib davolanishga majbur bo'lishardi.
Buning uchun qanchadan-qancha xarajat talab qilinar, bu ham yetmagandek, haftalab, oylab vaqt davolashda bemor bilan birga uning yaqin qarindoshlari ham ovorai sarson bo'lishardi. Termiz shahrida kordiologiya markazining ochilishi ana shunday ortiqcha tashvishlarga barham berdi.
O'tgan yillar mobaynida markazga malakali yetuk mutaxassislar jalb etildi. Keyingi to'rt yil ichida esa 15 milliard so'mlik eng so'nggi rusumdagi zamonaviy tibbiy asbob-uskunalar keltirilib o'rnatildi. Tajribali kordiolog-shifokorlar sa'y-harakatlari hamda ishlash, izlanish uchun yaratilgan shart-sharoitlar o'z natijasini berdi.
Quvonchlisi, shu yil Yangi yilning ilk haftasida yurak miokardidan azob chekayotgan 63 yoshli ayol jarrohlik amaliyotidan omon-eson chiqdi.
— To'g'risi, meni operatsiya qilishadi, deb olib kelishganda juda qo'rqqandim. Mendan ko'ra ham o'g'il-qizlarim qattiq xavotirda edilar. Operatsiya yaxshi o'tdi, hushim o'zimda. O'shanda hamma narsani ko'rib, sezib turgan bo'lsam-da, shifokorlarning daldasi tufayli meni qo'rquv tark etdi, — deydi Termiz tumanining “Guliston” mahallasida istiqomat qiluvchi uch qiz, ikki o'g'ilning onasi Noroy aya Nazarova. — Operatsiyadan so'ng o'zimni qayta tug'ilganday his etdim. Ikki kun deganda uyga javob berishdi. Buning uchun Bahodir G'afforov boshliq shifokorlardan va shunday noyob uskunalar bilan shifoxonani ta'minlagan davlatimizdan minnatdorman.
— Bilasizmi, aslida yurak sohasida qilinadigan bunday jarrohlik amaliyotlari zamonaviy tibbiyot olamida yangilik emas. Mamlakatimizning Toshkent, Samarqand, Qarshi shaharlarida hamda vodiy viloyatlarida yurak va yurak qon-tomir kasalliklari bo'yicha jarrohlik amaliyotlari allaqachon yo'lga qo'yilgan.
Respublika kordiologiya markazidan kelgan tajribali mutaxassis Baxtiyor Otamurodov, markazimizning mohir shifokorlari Kamol Yusupov, Shavkat Ermatov, Nuriddin Xudoynazarovlar bilan birgalikda Termizda ilk bor yurak jarrohlik amaliyotini ko'ngildagidek o'tkazganimizdan xursandmiz, — deydi viloyat kordiologiya markazi direktori Bahodir G'afforov.
Shu o'rinda mohir kordiolog-jarroh Bahodir G'afforov haqida ayrim ma'lumotlarni aytib o'tishni lozim topdik. U 1973 yil Boysun tumanidagi Yakkatol qishlog'ida tug'ilgan. Toshkent tibbiyot akademiyasini tugatgan. Keyinchalik, Toshkent kordiologiya ilmiy tekshirish institutida klinik ardinaturani o'tagach, o'tkir miokard infarkti laboratoriyasida ilmiy xodim va kordioreanimator shifokor bo'lib ishladi. Rossiyaning Novosibir shahrida 2008-2009 yillarda kordiologiya yo'nalishida malaka oshirdi. 2012 yildan buyon Surxondaryo viloyat kordiologiya markazi direktori bo'lib ishlab kelmoqda.
Shifokorlarning aytishicha, sog'lom inson yuragi daqiqada o'rtacha 70 martagacha urishi kerak. Kuni kecha markazga olib kelingan o'ta og'ir holatdagi yana bir bemor yuragi esa bor-yo'g'i daqiqada 35-36 marta urardi. Shoshilinch konsilum o'tkazildi. Bemor yuragi deyarli urishdan to'xtagan bir paytda, ya'ni koma holatida jarrohlik amaliyoti o'tkazildi. Mohir kordiolog-jarroh Bahodir G'afforov boshchiligida shifokorlar muvaffaqiyat bilan bemor yuragiga (sun'iy yurak) elektrokardiostimulyator o'rnatishdi. Bu amaliyot tufayli yana bir inson hayoti saqlab qolindi.
Yuqorida aytganimizdek, yurak xastaligidan aziyat chekayotgan Surxon vohasidagi yuzlab bemorlar uchun viloyat kordiologiya markazi benihoyat katta imkoniyat va imtiyozdir.
Biz esa el-yurt salomatligi yo'lida tunu kun fidokorona mehnat qilayotgan shifokorlarga qo'lingiz dard ko'rmasin, salomatlik posponlari deymiz.
Safar OMON,
“Hurriyat” muxbiri