Ohlaring g'animlar eshitmasin hech

Mavluda RO'ZIYEVA

Muallif haqida:

Mavluda RO'ZIYEVA — Samarqand viloyatining Ishtixon tumanidagi Xonaqa qishlog'ida tug'ilgan.

“Bir sevgi qismati”, “Onamni qaytaring yulduzlar”, “So'zdan tonib bo'lmas”, “Qo'sh irmoqlar”, “Tushdagi uchrashuv”, “Oy kulgan kecha” singari she'riy va nasriy kitoblari chop etilgan.

O'zbekiston Yozuvchilar va Jurnalistlar uyushmalari a'zosi.

 

                  BORINGIZGA…

Ming bor shukur bu olamda boringizga,

Nigoh tashlang bir bor bizdek yoringizga.

 

Soyangizman oftoblarda yursangiz gar,

Ergashurman tamanno raftoringizga.

 

Yangratsangiz tanburingiz sadolarin,

Ohang bo'lay chertadurgan toringizga.

 

Sayr etsangiz bo'stonlar-u bog'-rog'larda

Gul bo'loyin ochilib gulzoringizga.

 

Siz hayotda uchratgan Shohjahonimsiz,

Buyuringiz biz kabi poykoringizga.

 

Shaloladek kulguyingiz xummoriman,

Bir zum quloq solsaydim guftoringizga.

 

Mavludadek ko'nglingizga yo'llar topib,

Bir umrga aylansam dildoringizga.

 

               HAQNI IZLAB…

(Hasan Almatov g'azaliga muxammas)

Haqni izlash ba'zilarga ormikan,

Izlaganga baxt-u iqbol yormikan.

E'tiqodda hamma ham poydormikan,

Haqni izlab yo'lga chiqdim, bormikan,

Balki bunda topganim ozormikan.

 

Tinchgina orom olur ahli qubur,

Bu fanoda ba'zilar izlar huzur.

Ba'zilarning qalbida kibr-u g'urur,

Qayga boqsam, oldi-sotdi, urha-ur,

Bilmadim, bu qaynagan bozormikan.

 

Eng, yaqosiz barchasi kiygay kiyim,

Hech kimarsa ungacha bilmas tinim.

Neki tinmoq, yetmagay hargiz bilim,

Qalb atalmish bir chimildiq ichrakim,

Rost-u yolg'on bir-biriga yormikan.

 

Qadri yo'qdir yonginangdan o'tsa suv,

Har neki bilmak uchun darkor uquv.

Kim bilimsiz bo'lsa go'yo qo'y suruv,

Xilvatda nomusin sotgay suluv,

Nomus-u or shunchalar abgormikan.

 

Oh, umr daryosi muncha tez oqin,

Suv yalab-yulqaydi ikki qirg'og'in.

Har kishi eslaydi o'ksib yosh chog'in,

Ko'klamimda yuzlarim tortgay ajin,

Sochlarimda oppoq-oppoq qormikan.

 

Telba ko'ngil orom istar gohi-goh,

Kasbi kori goh savob-u goh gunoh,

Ey rafiq, ketma jahondan ro'y siyoh,

Gar orom istar esang oromigoh,

Ham muqaddas joyi ul mozormikan.

 

Dam-badam yozug' tilovchi bo'ldimu,

Mehr(i) ga mehrim ulovchi bo'ldimu,

Mavluda, Haqdin so'rovchi bo'ldimu,

Bir Hasan otlig' yo'lovchi bo'ldimu,

Haqni izlab yo'lga chiqdim, bormikan.

 

                IKKI QOShIM

Ikki qoshim aro quray Tojmahal,

Posbonlar joylashsin ko'z qarog'ida.

Chorlab turay, begim, sizni har mahal,

Darvoza ko'ksimning chap qirg'og'ida.

 

Bag'rim oqib turgan balki Gangadir,

Balki Bobur bobom boqqandir unga.

Boburiy qurdirgan o'shal mo''jiza

Balki yetib kelgan muborak kunga.

 

Ikki qoshim aro quray Tojmahal,

Raqslarga tushsin ishq farishtasi.

Bu joyda bo'lmaydi yolg'izlik, hijron,

Bu joyda bog'lanar ishqning rishtasi.

 

Yig'lama, bu joyda ko'zyoshga joy yo'q,

Yiqilsang suyanchiq bo'lguchilar bor.

Ohlaring g'animlar eshitmasin hech,

Sevgini muqaddas bilguvchilar bor.

 

Ikki qoshim aro quray Tojmahal,

Muhabbat bizlardan nolib ketmasin.

Sevgining dardida kuyib yurganlar

Bir kun loylar aro qolib ketmasin.

 

Sevganlar bog'i bo'l, ey Tojmahalim,

Barchasi bulbulday baxtdan sayrasin.

Muhabbatga lim-lim to'lgan yuraklar

Hijron azobidan yiroq yayrasin.

 

Ikki qoshim aro quray Tojmahal,

Ishqimizning ramzi, taxtimiz bo'lsin.

Sevgi tarixining zar varog'ida

Baxtli yashash uchun ahdimiz bo'lsin.

 

Ey ko'zimning nuri, ey shohjahonim,

Keling, qo'l ushlashib birga yuraylik.

Dilimdan ariting endi armonim,

Keling, Tojmahalni birga quraylik.

 

                       NAVRO'Z G'AZALI …

(Sirojiddin Sayyid g'azaliga muxammas)

Do'stlar, kechar umrimiz, har lahza-yu on yangi,

Osmonimiz musaffo, yulduzi g'ujg'on yangi.

Marjon bilan bezangan daraxtzor, bo'ston yangi,

Navro'z ila keng olam, bu kavni makon yangi,

Soylarda ajib tug'yon, suvlarda bayon yangi.

 

Barobarmi daryoyi Sayxun birla Nil rangi,

Olisdan xush ko'ringay tog'-u qir, mahfil rangi.

Ko'rinsa bo'lur erdi goh-gohi mazgil rangi,

Har yerda jarang bergay gul rangiyu dil rangi,

Bir lola iforidan bu ko'hna jahon yangi.

 

Zavq ila tabiatni quchmoqqa ochsak quloch,

Gulzorda gul ishqida sayrab tursa sanduvoch,

Navro'zoy kezib yursa Samarqand-u ko'hna Choch,

Sohilda kulol yanglig' loy tanlasa qaldirg'och,

Musicha bilan sa'va sayr etsa qayon — yangi.

 

Umr o'tar, goh kelur bir lahzaga tenglik oy,

Gohi tor-u gohida bir asrga kenglik oy.

Goho bo'ronli, yellik, goh yomg'irli sellik oy,

Evrilsa agar ro'zg'or ellik yilu ellik oy,

Ellik bila el yangi, qirq yilda qozon yangi.

 

Azob-u ingroqlarda eskirdi mening ko'nglim,

Tikanli yantoqlarda eskirdi mening ko'nglim.

Bulutli ofoqlarda eskirdi mening ko'nglim,

Hijronu firoqlarda eskirdi mening ko'nglim,

Kelgil, menga dil bergil, ey qoshi kamon yangi.

 

Jonim bilan asragum ul sirru nihoningni,

Shod ko'ray, ko'rsatmagil diydai giryoningni.

Sug'orsam mehrim ila bog' ila bo'stoningni,

Gul bargiga tekkizsang lab birla zaboningni,

Gul bargi bo'lur xandon, lab birla zabon yangi.

 

Kelar bo'lsang, ko'yingda jonimni ehson aylay,

O'zimni bir g'arib-u seni shohjahon aylay.

Yo'llaringga suv sepib, salqin-u imkon aylay,

Ko'z birla qarog'ingni jonimda nihon aylay,

Menga yangi jon, senga bu taxti ravon yangi.

 

Xazon bo'lgayki bog'lar, suv bo'lmasa boyakbor,

Yo bo'lmasa bog'larga bosmasa qadam dildor.

Xazonrezgi bog'larga, ayting, bog'bon ne darkor?

Qadriga yet, ey bog'bon, har g'unchanikim, takror

Bu bog' ila bu bo'ston bo'lgay qachon yangi?

 

Ne-ne xiyobonlarda bo'ldim yurib tamanno,

Ba'zan eshitdim ta'na, ba'zan esa tasanno.

Qaynadim, toshdim vale umrim o'tdi purma'no,

Toshqinsanu shoshqinsan umrim kabi, ey daryo,

Esiz, men eskirdim, sen ersa hamon yangi.

 

Mavluda, g'azal bitsang, senga kim xalal bergay?

Tegrangdagi do'stlaring ilhom-u jadval bergay.

Tuganmas iste'dodni taqdiri azal bergay,

Ayyom mahal bergay, ming pandu masal bergay,

Ming she'ru g'azal bergay bu davru zamon yangi.