Sohil malikasi
yoki “O'zsanoatqurilishbank” ko'magi bilan Surxon vohasida qamishdan mebel va qurilish materiallari ishlab chiqarish yo'lga qo'yilgani hamda boshqa istiqbolli loyihalar haqida
Mamlakatimizning eng chekka va uzoq tumanlaridan biri Muzrabot hisoblanadi. Bu manzil Amudaryo sohili bo'ylab Afg'oniston va Turkmaniston bilan chegaradosh. Tumanning janubi g'arbiy tomonidan sal kam 150 yillik moziyga guvoh bo'lgan temir yo'l o'tadi. Temir yo'lning chap tomonida esa ikki- uch ming yillik tarixga ega katta–kichik qishloqlar “Payg'ambar oroli” to'g'risigacha, aniqroq aytsak, Termiz tumaninig “Kaptarxona” qo'rg'onigacha cho'zilib borgan.
Bahor kelishi bilan Amudaryo sohilida jing'il, patta, saksovul kabi cho'l o'simliklari barg yozib ulgurmasidan, ming-ming gektarlab maydonda qahraton qishga isyon qilgandek qamishlar yerdan “nayzasi”ni ko'tarib chiqib, hafta- o'n kunda yam- yashil ummonga aylanadi. Sokin va suluv Amudaryo ularning bo'ychanligidan ko'rinmay qoladi. Bir so'z bilan aytganda, qamish sohilning malikasi — ramzi hisoblanadi.
Bejiz shoir:
Qamishzor shovullar, yurak entikar,
Men uchun qadrdon sohil, qamishzor… —
deya yozmagan-da! Eng muhimi, sohil Alloh inoyati bilan yaralgan bitmas–tuganmas xazina. Ana shu dillarni rom etib, yuraklarni entiktiruvchi sohil qamishzorlari bugungi kunda odamlarimizga rizq, iqtisodiyotimizga tayanch, sanoatimiz rivojiga omil bo'lmoqda. Qanday qilib deysizmi? Birinchidan, Prezidentimiz tomonidan mamlakatimizda tadbirkorlar va investorlarga keng imkoniyatlar hamda imtiyozlar berilganligi bugungi kunda har sohada o'z samarasini ko'rsatayapti. Yangi O'zbekistonning Taraqqiyot strategiyasida milliy iqtisodiyot barqarorligini ta'minlash barobarida yalpi ichki mahsulotda sanoat ulushini ikki baravarga ko'paytirish vazifasi qat'iy qilib belgilangan.
Taraqqiyot strategiyasida belgilangan sanoat sohasini yanada rivojlantirish borasida respublika “O'zsanoatqurilishbank” tomonidan davr talabidan kelib chiqib, birgina o'tgan yili 570 dan ortiq loyiha ishga tushirildi. Buning uchun 1,8 milliard AQSh dollari miqdorida investitsiya mablag'lari jalb qilinib, 15 mingdan ziyod yangi ish o'rinlari yaratildi. Ana shu xarajatlar evaziga ishlab chiqarilgan 611 million dollarlik mahsulotlar xorijiy davlatlarga eksport qilinganligi quvonarli holdir. Bu aytishga oson, amalda uning zamirida kattagina zaxmat, mashaqqatli mehnat va zamonaviy tadbirkorlik faoliyati yotadi.
Yurtning istiqboli, elning ma'murligi uchun xizmat qiladigan loyihalardan biri mahalliy tadbirkorlar sa'y-harakati va bankning moliyaviy ko'magida 2020 yilda Surxon vohasining Muzrabot tumaniga nasib qildi. Bu Termiz shahridagi “Surxon KSP grand” MChJ tizimidagi oddiy qamishdan sanoatbop plitalar, mebel va qurilish materiallari ishlab chiqaruvchi vohada yagona yirik zamonaviy korxona hamdir.
— Eng muhimi, zavodni to'la quvvat bilan ishlatish uchun xomashyodan zoriqmaymiz. Tumanimizda qamish keragidan ham ortiqcha. Faqat uni o'z vaqtida o'rib, tashib keltirish lozim. Bu esa boshqa turdosh korxonalarga nisbatan bizning zavodimizda ishlab chiqarilayotgan sanoat mahsulotlari sifatining yaxshiligiga, tannarxining arzonligiga garov bo'lmoqda, – dedi “Asiya KSP sifat” MChJ direktori Abbos Nabiyev. – Shuni ham aytish kerakki, yog'och qipiqlaridan tayyorlangan plitalar mo'rt va namga chidamsiz bo'ladi. Yog'och qipig'idan tayyorlangan uy jihozlari va mebelning ushlab turuvchi mexchalari qo'parilganda yana o'z joyiga qoqib yoki bekitib bo'lmaydi. Sababi, ko'chgan joyi o'yilib qoladi. Qamishdan tayyorlangan plitalardan esa mexchani ataylab ham sug'urib bo'lmaydi. Chunki qipiqqa qaraganda, qamish pishiq, zich va sifatli bo'ladi. Suvga solib qo'ysangiz ham bo'kib, shishib ketmaydi.
— Bu yilgi qahraton sovuq zavod jamoasi faoliyatiga qanday ta'sir qildi?! – degan savolimizdan so'ng direktorning qoshlari chimirilib ketdi.
— To'g'risi, ko'p qatori zavodimizni ham tabiiy gaz va elektrdan uzib qo'yishdi. Kunlar isishi bilan ishlab chiqarish hajmini qoplab yuborishga imkonimiz yetarli. Korxonamizning umumiy maydoni 10 gektar, loyiha qiymati 205 milliard 864 million so'm bo'lib, zamonaviy uskunalar Xitoy davlatidan bank kredit mablag'i hisobidan keltirib o'rnatilgan. Biz uchun muhimi, 400 nafar yoshlar doimiy, 200 nafari mavsumiy ish bilan band bo'lib, qora qozoni qaynaydigan bo'lgani. Korxonamiz ishchilari o'rtacha uch yarimdan o'n million so'mgacha maosh olishadi.
— Ko'rib turganingizdek, o'rib bog'lab kelingan qamish besh jarayondan so'ng tayyor sanoat mahsulotiga aylanadi. Maydalangan qamish maxsus yelim bilan qorilib, 2700 tonna bosim bilan zichlantiriladi, 180 daraja issiqlikda quritiladi. Tayyor plitalarni mebelga aylantirish uchun esa zamonaviy andozadagi bejirim, rangli laminantlar yopishtiriladi. Termizda eng so'nggi rusumdagi mebel ishlab chiqaruvchi fabrikamiz bor, uni ham biz mahsulot bilan ta'minlaymiz, — deydi mamnuniyat bilan zavod direktori.
Ma'lum bo'lishicha, qamishdan “Asiya KSP sifat” MChJ tomonidan zavodda yiliga 150 ming kub sanoatbop sifatli plita ishlab chiqariladi. Mamlakatimizda bu boradagi sanoat mahsulotlariga import ehtiyoji katta. Biz yiliga 100 million dollarga yaqin import o'rnini bosuvchi mahsulot tayyorlab, yurtimizdagi ichki bozor talablarini qondirishga harakat qilayapmiz.
O'zbekistonga Allohning nazari tushgan, deb bejiz aytishmaydi. Chindan yurtimizning xas- xazoni ham, o't-o'lani ham, tosh-tuprog'i ham, chang-to'zoni ham oltinga teng. Vatanimiz, millatimiz, kelajagimiz uchun sohil malikasi—parvarish, mehr, mehnat talab qilmaydigan oddiygina qamishning zarur qurilish va sanoat mahsulotiga aylanib yurt obodligi, iqtisodimiz barqarorligi, elimiz faravonligiga xizmat qilishi ham Yaratganning inoyati emasmi?!
* * *
Bugun jahondagi global taraqqiyot jarayoni talablaridan ortda qolish nafaqat inqirozga, balki imkonsiz muammolar girdobiga olib borishini ko'pchilik rad etolmaydi. Shu ma'noda ham Prezidentimiz rahnamoligida ishlab chiqilgan Taraqqiyot strategiyasida biror tizim yoki soha yo'qki, uning bugungi va kelgusi istiqboli, har tomonlama barqaror rivojlanishini o'z ichiga olmagan bo'lsin. Muhimi shundaki, bu boradagi qilinishi lozim bo'lgan ishlar, vazifalar aniq-tiniq ko'rsatib berilgan. Shu barobarida mamlakatimizdagi viloyatlar, tuman va shaharlardagi tadbirkorlar, investorlar salohiyati, ehtiyoj, talab hamda imkoniyatlaridan kelib chiqib har tomonlama amaliy yordam ko'rsatilayotganligi ayni muddao bo'lmoqda. Buni yaqindagina ish boshlagan Qumqo'rg'on tumanidagi “Business Capital” MChJ korxonasi misolida ham ko'rish mumkin.
— Biz “O'zsanoatqurilishbank”ning Surxondaryo viloyat hududiy boshqarmasi orqali xorijiy kredit yo'nalishi bo'yicha 1 million 64 ming yevroga Turkiya davlatidan zamonaviy un zavodi ilg'or texnologik uskunalar majmuini sotib oldik, – dedi korxona ta'sischisi Husan Murodov. — Ko'rib turganingizdek, besh qavatdan iborat zavodimiz tufayli xalqaro standart talablariga javob beradigan mahsulotni ishlab chiqarishni yo'lga qo'ydik. Bug'doyni kelishilgan shartnoma asosida Qozog'iston Respublikasidan olayapmiz. Ayni paytda o'zimizning ichki va xorijiy bozorlarga yiliga 54 ming tonna a'lo navli mahsulot yetkazib berayapmiz.
— Ushbu loyiha tufayli 32 nafar mahalliy yoshlar doimiy ish bilan band bo'lishgan. Shu yil aprel oyi oxirida zavod to'liq ishga tushishi bilan rejaga ko'ra ishchilar soni 60 tadan oshadi, — deydi korxonaning muhandis-ustasi Soatmurod Amirqulov. — Tumanimizning “Azlarsoy” mahallasida 0,85 sotix yerda joylashgan bu tegirmon bir kecha-kunduzda 150 tonna bug'doyni qayta ishlash imkoniyatiga ega. Aholining ehtiyojidan kelib chiqib, non va non mahsulotlari ishlab chiqaradigan sexni ham ishga tushirganmiz. Bundan tashqari, bug'doy kepagini chorva ozuqasi sifatida fermerlarimizga yetkazib berayapmiz. Bunday xizmatlarimizdan mahalliy aholi va mijozlarimiz mamnun.
Ilg'or texnologiyalar asosida jihozlangan ishlab chiqarish korxonalarining ish jarayonlari bilan tanishar ekanmiz, hamkasbim, “Uzreport TV” muxbiri Sherali Bo'riboyev hayajonlarini yashirolmadi.
— Hisor, Bobotog' manzaralari, Surxon tabiati, muhiti, odamlari o'zgacha ekan. Yam-yashil qir-adirlarini ko'rib bu yerdan ketging kelmaydi. Odamlarning tomorqasida yetishtirilayotgan piyoz, sabzi, karam, pomidor, bodiring, bulg'or qalampiri, sarimsoq, kartoshka va turli ko'katlarni ko'rib, ko'zing quvonadi. Yana issiqxonada emas, ochiq maydonda. Hali ko'pgina viloyatlarda bahor yumushlari boshlanmagan. Yana o'n-o'n besh kundan so'ng tomorqada yetishtirilgan mahsulotlar bozor peshtaxtasiga chiqsa ajabmas. Men Surxon vohasiga ilk kelishim, ochig'i, bunaqa jannatiy go'sha deb o'ylamagandim.
Xalqimizda kulchali bola suyushga yaxshi, degan maqol bejizga aytilmagan. Vatanimizning har bir tumanida, mahallasida yuqoridagidek tadbirkorlar qanchalik ko'p bo'lsa, sohalarda erkin raqobat kuchayib, xalqimizning turmush darajasi shunchalik yaxshilanib boradi, bozor narxlari arzonlashadi.
* * *
…Respublika “O'zsanoatqurilishbank”i tomonidan shu yil 21-22 fevral kunlari Surxondaryo viloyatida o'tkazilgan press-tur jarayonida ommaviy axborot vositalari xodimlari yuqoridagi korxonalar faoliyati bilan batafsil tanishtirildi. Ijodiy sayohatimiz so'nggida OAV vakillari uchun bankning viloyat hududiy boshkarmasida brifing tashkil etildi. Unda mijozlarga xizmat ko'rsatish borasida belgilangan vazifalar va tegishli rejalarni bajarish xususida atroflicha ma'lumotlar berildi.
— Bizning birinchi vazifamiz ishochli va sifatli xizmat ko'rsatish. Bu ish mijozlarni ochiq yuz va xushmuomalalik bilan kutib olishdan boshlanadi, — dedi bankning viloyat hududiy boshqarmasi boshlig'i Bahodir Arziqulov. – Olib kelingan texnik qurilmalarning uzluksiz ishlashini, qabul qilingan dasturlarning muntazam bajarilishini ta'minlashga harakat qilayapmiz. Mamlakat iqtisodiyotini yuksaltirishda asosiy omil bo'layotgan tabirkorlarimizning birinchi talabini qanoatlantirish yo'lida doimo izlanishdamiz.
Tadbirda ta'kidlanishicha, bankning faol mijozlari 1,5 kredit ajratish hajmi esa bir yil davomida 2,2 baravarga oshgan. Mijozlarning bankdan masofaviy foydalanishi 115 foizga ko'paygan. Joriy yilda viloyat aholisiga 75,5 milliard, tadbirkorlar va yirik korxonalarga 175,76 milliard so'm kredit mablag'lari ajratish rejalashtirilgani aytib o'tildi.
OAV xodimlari o'zlarini qizitirgan savollarga atroflicha javob oldilar.
Safar OMON,
“Hurriyat” muxbiri.
Reklama huquqi asosida.
Xizmatlar litsenziyalangan.