SAMARQAND SEHRI

Hindistonning “Business of Travel Trade – BOTT” ixtisoslashgan sayyohlik jurnalida qadimiy Samarqand shahri va turizm sohasidagi O'zbekiston – Hindiston hamkorligi haqida maqolalar chop etildi.

 “O'zbekiston va Hindiston o'rtasidagi ko'p qirrali hamkorlik chuqur tarixga ega. Ikki davlat turli yo'nalish­larda, jumladan, siyosat, iqtisodiyot, ta'lim, sport, madaniyat va gumanitar sohalarda uzoq yillik hamda vaqt sinovidan o'tgan sheriklik munosabatlarini rivojlantirib kelmoqda, — deb qayd etilgan nashrda. – Shu ma'noda turizm sektori o'zaro aloqalarning muhim jabhalaridan biri sifatida ajralib turadi”.

Material muallifi O'zbekiston Hindistonda o'zining salmoqli sayyohlik salohiyatini targ'ib qilishdan manfaatdor ekani, hindistonlik sayohatchilarga mamlakatning boy madaniyati va an'analari, albatta, tashrif buyurilishi kerak bo'lgan maskanlari, shuningdek, zamonaviy ta'lim olish uchun qulay sharoitlar yaratilgan Toshkent, Samarqand, Buxoro, Xiva, Andijon, Farg'ona, Namangan, boshqa qadimiy va hamisha navqiron shaharlari haqida rang-barang ma'lumotlarni taqdim etayotgani to'g'risida so'z yuritgan.

“Bu sa'y-harakatlarda O'zbekistonning Dehlidagi elchixonasi ikki mamlakat o'rtasidagi bog'lovchi ko'prik vazifasini o'tamoqda, turli marketing kompaniyalarida ishtirok etish, yangi sayohat paketlarini taqdim etish va Hindiston bo'ylab iste'molchilar uchun targ'ibot tadbirlarini o'tkazish orqali yuksak rejalarni amaliyotga tatbiq etmoqda”, — deb ta'kidlagan “Business of Travel Trade – BOTT” muxbiri.

Shundan so'ng jurnal o'quvchilari e'tibori Hindistonning moliyaviy poytaxti – Mumbay shahrida O'zbekiston sayyohlik salohiyatiga bag'ishlab uyushtirilgan keng ko'lamli roud-shou tafsilotlariga qaratilgan. Mazkur taqdimot marosimi O'zbekiston va Hindistonning turizm sohasidagi yaqin hamkorligining yana bir yorqin namunasi bo'ldi, ikki buyuk davlatni bir-biriga yaqinlashtirdi, Hindiston aholisiga O'zbekiston, uning tarixi, xalqaro miqyosda tan olingan haqiqiy mehmondo'stlik an'analari haqida rang-barang ma'lumot olish imkonini berdi, deb qayd etgan ixtisoslashgan nashr.

“Samarqand: Jahon madaniy turizm poytaxti” sarlavhali maqola muallifi “O'zbekistonning sharqiy-markaziy bag'rida o'tmish tamaddunlari haqida shivirlab hikoya qiladigan, har bir toshi tarixiy davrlardan guvohlik beradigan shahar joylashgan. Ikki ming yildan ortiq boy tarix va madaniy uyg'unlikning jonli guvohi bo'lgan Samarqand shahriga xush kelibsiz”, deb urg'ulagan.

Jurnalist qadimiy shaharning jozibadorligini anglashga harakat qilib, shunday xulosaga kelgan: “Samarqandning sehri uning tarixiy xazinalari – masjid, madrasa va maqbaralarning maftunkor uyg'unligidadir. Shahar markazida YuNESKOning Butunjahon merosi ro'yxatiga kiritilgan Registon joylashgan bo'lib, u bir vaqtlar bozorlar va karvonsaroylarning shovqiniga burkangan, hukmdorlar farmonlarining aks sadosi yangragan gavjum maydon bo'lgan. Registon Samarqand boy tarixining mazmun-mohiyatini o'zida mujassam etgan bo'lib, mehmonlarni ushbu ajoyib shahar bunyod etilgan o'tgan davr­larga sho'ng'ishga chorlaydi”.

Muallif sayyohlarga shaharning sirli o'tmishidan hikoya qiluvchi tarixiy gavjum ko'chalari bo'ylab sayr qilish, ulug'vor Bibixonim madrasasining jozibadorligi, Ulug'bek rasadxonasining samoviy mo''jizalari, Xoja Ahror majmuasining sokin muhiti, Afrosiyobning qadimiy sehrini his qilishni maslahat beradi. “Tarixiy shaxsning bardavom merosini aks ettiruvchi Amir Temurning hayratlanarli maqbarasini ziyorat qiling. Bu yerdagi qo'yilgan har bir qadam tarixning mazkur jonli kitobidan yangi kashfiyotlar ochishga imkon beradi”, — deyiladi nashrda.

Maqolada Samarqandning me'moriy yodgorliklari, jonli va sershovqin Siyob bozori, kichik do'konlari va butiklari rang-barang tarzda tasvirlangan. Shahar restoranlari o'zbek va boshqa xalqlarning ovqat tayyorlash usullari uyg'unlashgan pazandalik mo''jizasi, deb atalgan.

“Boy madaniyat va merosning jonli solnomasi bo'lgan Samarqand sizni nafaqat esdalik sovg'alar bilan, balki o'z qalbining bir parchasi bilan vataningizga qaytishga chorlaydi. Moviy gumbazlar va labirint ko'chalar bilan xayr­lashar ekansiz, bilingki, Samarqand sehri mangu saqlanib qoladi hamda O'zbekiston maftunkor tarixining qoq bag'riga qilgan sayohatingizdan aks sado berib turadi”, — deya xulosa qilgan maqola muallifi.

“Dunyo” AA,

Dehli.