Armondir qalbimda lovullagan cho'g'…
Bahrom AKBAROV,
O'zbekiston Yozuvchilar uyushmasi a'zosi
OTABEK MAKTUBI
Kechirgaysiz, Kumushoyim,
Sizdan xabar ololmadim.
Marg'ilonga borgan chog'im
Diydoringiz ko'rolmadim.
Otim burdim uyingizga,
Sig'may qaytdim ostonadan.
Begim deya suysangiz-da,
Farqim yo'qdir begonadan.
Tun qo'ynida kezdim sarson,
Jin ko'chalar – dev, yalmog'iz.
Xayollarim ezgay yomon,
Malaksiymo – sizsiz yolg'iz.
So'zlaringiz eslab dilim,
Diltorini chertar bo'lsa.
Zardoblarga to'lar lim-lim
Tanam sarxush etgan bo'za.
Dard tog'dayin ishqim sinab,
Sabr kosam to'ldirdi-ey.
Hijron esa kunda qiynab,
Azoblarda o'ldirdi-ey.
Osmon uzoq, zamin qattiq,
Bulut o'rlar boshimda.
Samolarga sachrab ketgan,
Yulduzlar sirdoshim-da.
Kutib olar usta Alim,
Takror borsam Marg'ilonga.
Saodatning qissalari
Azob berar shirin jonga.
Pok tuyg'uga panja urgan,
Fosiqlarning fisqidan dod.
O'rtamizda devor bo'lgan,
Iblis Homid ekan jallod.
Yaratgandan so'raganim,
Faqatgina sabr bo'ldi.
G'animlarning g'animligi,
O'zi uchun jabr bo'ldi.
Kechirgaysiz, Kumushoyim,
Maktubimni berolmadim.
Marg'ilonda yurgan chog'im,
Diydoringiz ko'rolmadim.
Qochoq kabi bukun, afsus,
Toshkent sari ketmoqdaman.
Yurakdagi nolalarim,
Maktub etib bitmoqdaman.
ARMON
Oyog'im ostida shitirlab xazon
Dunyo foniyligin unsiz eslatar,
Sog'inchlar yuragim o'rtab nogahon
Dard yanglig' tanamni sim-sim
qaqshatar.
Vujudim tilkalar mahzun o'ylarim,
Girdobga aylanib uchar Siz tomon.
Sabrga dosh bermay ingraydi dilim,
Sizni ko'p sog'indim,sizni Onajon!
Onajon
Bir bora ko'rsaydim takror,
Osmonda oy yuzi yarqirab ketar.
Qo'limni uzatsam agar samoga,
Eng chiroyli yulduz – Zuhroga yetar.
Qaniydi, hovlimga kelsangiz kirib,
Oydin chehrangizda mavj urib nurlar.
Talpinsam yosh bola misoli shoshib,
Atrofingiz qurshab tursa-da hurlar.
Poyingiz ostiga boshimni qo'yib,
Bosgan izlaringiz ko'zimga surtsam.
Yig'lasam, yig'lasam dardlarim to'kib,
Onajon, sizni ko'p sog'indim desam.
Qadoq qo'llaringiz silasa boshim,
Bag'ringizda yotsam quvonchga to'lib.
Sevinchdan yuzlarim yuvsa ko'z yoshim,
Qiyqirib kulsaydim yosh bola bo'lib.
Qaniydi o'ylarim bo'lsa mustajo,
Yurakdan dardlarim yuvilib ketar.
Kaftlaringiz ochib qilsangiz duo,
Duolar nur bo'lib haqqa ham yetar.
Hovlim tegrasida to'xtardi Quyosh,
Kamalak yog'dudan qolardi hayron.
Kelinlar shoshardi, ko'zlarida yosh,
Hovlim hayratlarga cho'mardi shu on.
Uyimda go'yoki hayit boshlanar,
Nabiralar chopar sizni ko'rgan chog'.
Katta-yu kichigi navbat talashar,
Ko'rishmak ilinji, ochgansiz quchoq.
Bog'imda bir zumda evrilar hayot,
Daraxtlar kelinchak bo'lib oladi.
Bodom g'unchasidan taralib bayot,
Qaldirg'och qo'shig'in boshlab qoladi.
Siz ekkan, siz suygan oq atirgullar,
G'unchasin ochadi, labda tabassum.
Iforin taratar sadarayhonlar,
Boychechak alyori tinmaydi bir zum!
Iforiy islardan yashnab ketar bog',
Bu sizning bog'ingiz axir, Onajon!
Nabiram nomida yashar ismingiz
Shoningiz dillardan o'chmas hech qachon!
Onajon, qaniydi, bir bor ko'rsaydim,
Izlaringiz o'pib ko'zga sursaydim…
* * *
Cen faqat yig'lama, xayrlash kulib,
Oyning jamolini o'g'irlagan qiz.
Qalbingda yasharman bir xayol bo'lib,
Izhorlar qalbingda uyg'otolsa his,
Balki, boshing uzra socharman yog'du.
Axir men yulduzman lovullab turgan,
Gohida soyangman qo'lingdan tutib
Umid bog'larida yonma-yon yurgan.
Men yana qaytgan choq yonadi hijron
Armonlar ortingdan qoladi yig'lab
Er yigit boshida bordir bu dovon,
Yig'lama hozir sen bag'rimni tilib.
Sen faqat yig'lama, xayrlash kulib…
* * *
Sen asta kelgan chog' yonimga kulib,
Orzumand qalbimda gulladi bahor.
Jodu ko'zlaringda o'zimni ko'rib,
Ilohiy ishq ichra yasharman xushhol.
Lahzalik xayolim shunchaki ro'yo
Armondir qalbimda lovullagan cho'g'.
Hulkarsan samoda qoshiga chorlab
Ahvolimni ko'rib holimdan kulgan.
Neki bo'lsa mayli, taqdirimda bor,
Ishqni sen yaratding, yo Qodir Alloh.
Kechirgin va etma bandang aslo xor,
Go'zallikka boqmoq bo'lsa gar gunoh.