Yangi O'zbekiston bunyodkori
Taniqli olim, tarix fanlari doktori, Qurolli kuchlar akademiyasi professori Karim Normatovning “Yangi O'zbekiston bunyodkori” deb nomlangan siyosiy essesi yaqinda O'zbekiston Respublikasi Qurolli kuchlar akademiyasi tomonidan kitob holida chop etildi. Ushbu kitobda Prezidentimiz Shavkat Mirziyoyev tomonidan milliy kadrlar tayyorlash va mamlakat taraqqiyoti yo'lida olib borilayotgan oqilona siyosat jadid bobolarimizning bebaho pand-nasihatlari, ezgu g'oya va dasturlariga har jihatdan uyg'un va hamohangligi, shuningdek, rahbar kadrlarning vazifasi, burchi va mas'uliyati, sohalar bo'yicha kadrlar mushtarakligi hamda strategik taraqqiyotning istiqboli xususida atroflicha so'z yuritilgan.
Quyida mazkur kitob muqaddimasidan olingan maqola qisqartirilgan holda e'lon qilinmoqda.
Yangi O'zbekistonni dunyoning rivojlangan, qudratli mamlakatiga aylantirish yo'lidagi orzu-intilishlarimizni ro'yobga chiqarish uchun tabiiy hayot tagzamini va zaxiralari yetarli darajada imkoniyat yaratib bermoqda. Ezgu maqsadlarga erishish, jahonning o'ta ravnaq topgan davlatlari qatoridan joy olish, suveren, demokratik, huquqiy ijtimoiy va dunyoviy davlat hamda fuqarolik jamiyatini bunyod etishda rahbarlar va mas'ullarning aqliy salohiyati va ma'naviy dunyoqarashi hal qiluvchi ahamiyatga ega bo'ladi. Zero, O'zbekiston Respublikasi Prezidentining quyidagi so'zlari ayni muddaodir: “Biz o'tkazayotgan siyosatning ro'yobga chiqishi rahbar kadrlar faoliyati bilan uzviy bog'liq. Bugungi hayotimizning qaysi masalalari va vazifalari haqida, qaysi istiqbollari haqida gapirmaylik, boshqarish va ishlab chiqarishning barcha bo'g'inlarida hamma narsa bugun kadrlarga va yana kadrlarga borib taqaladi”. Davlat xizmatining obro'-e'tibori hokimiyat vakolatlarini amalga oshiruvchi sub'yekt sifatidagi rahbar kadrlarning boshqaruv mahorati, mas'uliyati va ma'naviy-ma'rifiy darajasiga, uning kasb mahorati hamda dunyoqarashiga bog'liq.
Shuningdek, Prezidentimizning sakkiz yil oldin yozilgan “Bugungi kun rahbari” risolasida quyidagilar ta'kidlandi:
“— Biz yurtimizda yangi davlat, yangi jamiyat qurish yo'lida qanday ish qilsak ham, barchasini xalqimiz bilan bamaslahat qilamiz;
— barchamizni tarbiyalagan, voyaga yetkazgan shu xalq. Hammamizga tuz-nasiba bergan ham shu xalq, bizga ishonch bildirgan, rahbar qilib saylagan ham aynan shu xalq, xalq rozi bo'lsa, ishimizda unum va baraka bo'ladi;
— barcha darajadagi rahbar va mas'ul xodimlarning og'zaki va yozma murojaatlar bilan ishlashga bo'lgan munosabatini tubdan o'zgartirish kerak;
— rahbarlar muntazam ravishda xalq orasida bo'lib, shaxsiy qabullar tashkil etishlari, joylardagi muammolarni hal qilishlari zarur;
— bundan keyin joylardagi rahbarlar faoliyatiga birinchi navbatda ular boshqarayotgan hududdagi aholidan tushayotgan murojaatlar soni, ularning xalq ichidagi yurishi, mavjud muammolarning amaliy yechimiga qarab baho beriladi. Qisqa qilib aytganda, rahbarlarga xalqning o'zi baho beradi”.
Hayot tez sur'atlar bilan o'zgarib borar ekan, shunga muvofiq har bir rahbar oldiga ulkan va o'ta mas'uliyatli vazifalar qo'yildi. Zamonaviy rahbar bugungi hayot bilan hamqadam bo'lishi, muammolarni tezda anglashi hamda ularning yechimiga haqqoniy javob topa olishi kerak. Buning uchun rahbarlik vazifasiga o'tirgan har qanday shaxs nafaqat o'z ishini yaxshi bilishi, yetarli bilimlarga ega bo'lishi, balki xalq bilan hamnafas yashashi, el-yurt orzu-intilishlari va dardlarini anglashi, bir so'z bilan aytganda, yuksak ma'naviy fazilatlar egasi bo'lishi, eng muhimi, ularni rozi qilishi lozim.
Yurtboshimizning: “Biz iqtisodiy o'nglanish, iqtisodiy tiklanish, iqtisodiy rivojlanishni ma'naviy o'nglash, ma'naviy poklanish, ma'naviy yuksalish harakatlari bilan tamomila uyg'un bo'lishini istaymiz”, — degan fikrlarini amalga oshirishda bugungi rahbarning o'rni alohida.
Rahbar — yo'lboshchi, sardor, yetakchi degan lug'aviy ma'nolarni anglatib, jamiyat, davlat hamda tashkilotda doimiy va hal qiluvchi ta'sirga ega bo'lgan shaxs, shuningdek, ishning qalovini topgan, jamoa, soha manfaatlarini ko'zlab faoliyat yuritadigan boshqaruv xodimidir. Hozirgi shiddatli rivojlanish boskichlari rahbardan aql-farosat, did, kuch-g'ayrat, izlanish va topqirlikni, o'z ustida tinmay ishlashni, tadbirkorlikni talab qiladi.
Etakchilik mas'uliyatini o'z bo'yniga olgan har qaysi odam bu haqiqatni hammadan ham ko'ra ko'proq anglashi, el-yurtga qaratilgan har qanday zarbani o'ziga olishga qodir bo'lishi lozim. So'nggi sakkiz yilda bu jarayonlar Yangi O'zbekiston maqomini olgan yurtda mutlaqo o'zgardi. Hozirgi xalq zamon zaylidan kelib chiqib, yangi qiyofaga kirdi, Yangi O'zbekistonning jahon andozalariga a'lo darajada javob beradigan, inson qadri qadrlangan — Inson kapitaliga aylandi.
Rahbarlik boshqaruvida hammaning ishtiroki hozir va kelajakda ham har bir barkamol inson tomonidan amalga oshiriladigan vatanparvarlik, bunyodkorlik, istiqbolli yurtni yanada yuksaltirish uchun halol va pokiza mehnat qilish hosilasidir.
Rahbarlik barkamollik mezoni — fidoyi bo'lish, har bir ishga tanqidiy tahlil nuqtai nazaridan qarash, qonun ustuvorligini ta'minlash, tartib-intizomga rioya qilish, qat'iyatlilik insoniy xislatlarining namoyon bo'lishidir. Shu bois ham talabchan va bunyodkor Yurtboshimizning yangi mo''jizaviy tashabbuslari yetti yilda O'zbekiston Respublikasini rivojlantirishning beshta ustuvor yo'nalishi bo'yicha Harakatlar va Taraqqiyot strategiyasidagi vazifalarning qanday amalga oshirilishi — ijro intizomiga qat'iy rioya qilish jadal taraqqiyotning muhim omili bo'lib, muhtaram Shavkat Miromonovich rahbarlik mezoniga alohida e'tibor qaratmoqda, eng muhimi, qonun ustuvorligi yuqori pog'onaga ko'tarilyapti.
Rahbar kadrlarni qarindoshlik, hamshaharlik yoki shaxsiy sadoqat belgilari bo'yicha tanlash va joy-joyiga qo'yish holatlariga yo'l qo'ymaslik kerak. Guruhbozlik, mahalliychilik, nepotizm ko'rinishlarini yo'qotish, shuningdek, o'z xizmat vazifalarini suiiste'mol qilmaslik rahbar xodimlar qo'yadigan talablar sirasiga kiradi.
Rahbar:
– manfaatlar to'qnashuvining oldini olish va ularni tartibga solish yuzasidan o'z vaqtida chora-tadbirlar ko'rishi;
– korrupsiyaning oldini olish va unga yo'l qo'ymaslik choralarini ko'rishi;
– xodimlarni samarali boshqarishi, o'ziga ishonib topshirilgan mulkka va moliyaviy mablag'larga ehtiyotkorlik va tejamkorlik bilan munosabatda bo'lishi shart. Rahbar o'ziga bo'ysunuvchi, xizmatdagi xodimlarning xulq-atvor, yurish-turishi, tartib-intizomga rioya qilishlari uchun ham mas'uldir.
Ma'lumki, odamlar har xil bo'ladi, ularning yurish-turishi, fe'l-atvori ham bir-biridan farq qiladi. Lekin rahbar bo'lib, shaxsiy mas'uliyatni o'z zimmasiga olgan shaxs, yoqadimi-yo'qmi, har bir xodimga, avvalo, ishning manfaatini ko'zlab, to'g'ri baho berishi kerak. Shuning barobarida uning fidoyiligi rahbarga xos barkamollikda, donishmandligi va zukkoligida namoyon bo'ladi. Ayni paytda g'aflat va befarqlik, manmanlik, maslahatsiz qilingan yumushlar qanday oqibatlarga olib kelishi barchaga ma'lum. Bu holatlar bizni boshi berk ko'chaga olib borishi muqarrar! Iloyo, Xudoning o'zi bundan asrasin!
Darvoqe, 2023 yilning 8 may sanasida Prezident Shavkat Mirziyoyev Oliy Majlis palatalari a'zolari, siyosiy partiyalar va jamoatchilik vakillari bilan uchrashuv nutqida quyidagilarni ta'kidladilar: “Bizning uch ming yillik davlatchilik tarixiga boy va betakror madaniyatga ega bunyodkor xalqimiz bor, qirq millionga yaqinlashib borayotgan bugungi O'zbekiston xalqining taqdiri va istiqboli, farovon hayoti uchun barchamiz mas'ul va javobgarmiz, shu sababdan yurtimizda tinchlik va barqarorlikni asrash va mustahkamlash bundan buyon ham eng muhim vazifamiz bo'lib qoladi”. Demak, milliy xavfsizlikni ta'minlash, Qurolli Kuchlarimiz jangovar salohiyatini oshirishga qaratilgan ishlarimizni yangi bosqichga olib chiqish ustuvor vazifamiz hisoblanadi.
Kengashib ish tutish xalqimizning azaliy odati. Sohibqiron Amir Temur bobomizning: “Davlat ishlarining to'qqiz ulushi kengash, tadbir va mashvarat, qolgan bir ulushi esa qilich bilan bajo keltirilishini angladim”, deganlar, ammo o'sha davrda ham katta-kichik xatolarga yo'l qo'yilgan va ayrim kamchiliklar sodir bo'lgan.
Ochig'ini aytish kerak, bizning o'ta yorqin kunlarimizga, sakkiz yildirki, Yangi O'zbekistonga mustahkam tamal toshi qo'yildi. Akademik Azamat Ziyo juda haq gapni aytgan: “Bugun uzoq vaqt ilmimiz, so'ng u orqali xalqimiz ongiga singdirib kelingan soxta qoliplarni chilparchin etish imkoniga egamiz. Ulardan biri buyuk Sohibqironning o'ttiz besh yillik hukmdorlik faoliyati go'yoki tinimsiz urush-talashlarda o'tgani haqidagi to'qimadir”.
Tarix — Haq tarixi oldida yaltoqlanib bo'lmaydi. Qariyb 130 yillik tarixni soxtalashtirib, har xil ko'yga solib keldik. Ayniqsa, buyuk Amir Temur tarixi — ulug', haqqoniy tarix ma'lum darajada to'qimaga aylangani bor gap! Akademik Azamat Ziyo yozadi: “Dunyoni Samarqand atrofida birlashtirishga erishgan donishmand bobomiz maqsadiga harbiy yurishlar emas, balki chuqur va har tomonlama bilim hamda kengashlar orqali yetganini baralla aytishimiz kerak. Aytibgina qolmay, o'zbek davlatchiligiga xos ushbu an'ana — siyosiy madaniyat Yangi O'zbekistonda tiklangani va natijalarini berayotganini ham urg'ulashdan tortinmasligimiz lozim.
Mana, to'rt yildirki, har birimizning hayotimizda tengsiz ahamiyatga ega ma'naviyat va ma'rifat hamda xavfsizlik masalalari tahliliga bag'ishlangan kengashlar ishida qatnashib kelmoqdamiz. Ushbu yig'ilishlarga tegishli mansabdorlardan tashqari barcha ijtimoiy qatlamlar vakillarining taklif etilishi boshida yangilik bo'lsa, endi tabiiylikka aylandi. Eng muhimi, davlatimiz va jamiyatimiz uchun o'ta dolzarb masalalar yechimi ustida bosh qotirishga el-ulusning o'zi jalb qilinmoqda”.
Albatta, o'tgan yetti yillikda Yangi O'zbekistonning siyosiy-huquqiy, ijtimoiy-iqtisodiy va ma'naviy-ma'rifiy sohalardagi tashabbuslari xalqaro maydonda faol ilgari suriladi. Eng avvalo, qo'shni davlatlar bilan yaxshi qo'shnichilik va strategik sheriklik munosabatlarini jadal rivojlantiryapmiz. Yosh avlodni harbiy-vatanparvarlik ruhida tarbiyalash, Vatanga muhabbat va Prezidentga sadoqatini oshirishga yanada ko'proq ahamiyat beramiz, milliy va umuminsoniy qadriyatlarga hurmat va ezgu g'oya atrofida birlashish bo'yicha samarali ishlar olib borishimiz zarur.
Davlatimiz rahbari 2023 yil 22 dekabrda Ma'naviyat va ma'rifat kengashining kengaytirilgan yig'ilishida: “…Biz bugungi keskin sharoitda g'oyaviy-mafkuraviy sohada raqobatga tayyormizmi? Yosh avlodimiz tarbiyasi murakkab zamon talablariga javob beryaptimi? Agar biz bu yorug' dunyoda “o'zbek”, “O'zbekistonlik”, “O'zbekiston” degan nomlar bilan yashab qolishni istaydigan bo'lsak, bu savollarga bugun javob topishimiz va ularni hal etish bo'yicha amaliy harakatlarni aynan bugun boshlashimiz shart. Ertaga kech bo'ladi”, deya qat'iy ta'kidladi.
Shu tobda ko'nglimga ikki fikr keldi. Birinchisi, “Tarbiya biz uchun yo hayot — yo mamot, yo najot — yo halokat, yo saodat — yo falokat masalasidir”, degan jadid bobomiz Abdulla Avloniy da'vati bo'lsa, ikkinchisi, Prezidentimizning davlat mustaqilligi o'ttiz ikki yillik bayramiga bag'ishlangan nutqida quyidagi: “Davlatning vazifasi insonlarni baxtli-saodatli qilishdir. Bu maqsadga esa ilm va yaxshi axloq yordamida erishiladi”, degan purma'no so'zlaridir. Bularning barchasi Prezident qat'iyatli inson, metin va bukilmas siyosiy iroda sohibi ekanligini tasdiqlaydi.
Insonni, shaxsni o'rganish hamda ilmiy ta'rif-tavsif berish muammosi — insonshunoslik bilan bog'liq ijtimoiy fanlarning barcha sohalari uchun abadiy jumboq, cheksiz-chegarasiz munozaralar olami. Kishilik jamiyatida ne-ne olimlaru fozillar, donishmandu allomalar inson + shaxsning mohiyati, uning paydo bo'lishi, jamiyat sarvari va sardori sifatidagi voqeligi haqida munozara qiladi, mushohada yuritadi, o'rganadi va tadqiq etadi.
Albatta, shaxsning o'ziga xos belgisi jamiyatda o'z o'rniga ega bo'lishi, muayyan mavqega, ya'ni martabaga erisha olishidir. Chunki aqlli inson jamiyatda mo'ljal olish, muayyan maqsad yo'lida o'zini safarbar eta bilish imkoniyatiga ega bo'ladi va ayni paytda jamiyatga foyda keltiradi. Ana shunda u yaratgan qadriyatlar bevosita shaxs qadriyatiga aylanadi, inson kapitali sifatida yangi qirralarga ko'tariladi.
Haqiqiy barkamol shaxs har qanday qadriyatni qadrlay oladi, hurmat qiladi va ayni paytda o'ziga nisbatan hurmatni ham talab etadi. Aniq yakuniy xulosaga ega bo'lmagan inson jamiyatning sarvari va sardori bo'la olmaydi. Voqea-hodisalarga o'z munosabatini bildira olmaydigan, boshqalar fikri bilan yashaydigan, vaziyatga qarab ish tutadigan, o'ta yumshoq va noshud inson shaxs bo'lib yetisha olmaydi. Demak, shaxs o'z qiyofasiga, o'z yakuniy xulosasiga, har qanday vaziyatdan chiqa olish iqtidoriga ega bo'lishi kerak!
Mamlakatimizda bu qo'shaloq, ammo o'ta mas'uliyatli, ya'ni bir-biriga uyg'unlashgan atamalarga alohida e'tibor qaratish kerak. Inson har qanday umumqadriyatlar darajasiga ko'tarilgan milliy manfaat atrofida ongli ravishda hamda aql-idrok g'oyasi asosida jipslashadi. Prezident Shavkat Mirziyoyevning qat'iy ta'kidiga ko'ra: “Zamon shiddat bilan rivojlanib borayotgan hozirgi davrda kim yutadi? Yangi fikr, yangi g'oya, innovatsiyaga tayangan jamiyat va davlat yutadi”.
Shu o'rinda bu borada Prezidentimizning eski g'oyaviy-mafkuraviy qarashlarga nisbatan aytgan va hozirgi milliy taraqqiyotimiz ravnaqi uchun nihoyatda ustuvor hisoblangan yangi g'oyaviy-mafkuraviy tamoyilni keltiraman: “Biz ko'p yillar davomida amal qilib kelingan “davlat — jamiyat — inson” tamoyilini o'zgartirdik. Mamlakatimizda avvalo, inson, keyin esa jamiyat va davlat manfaati barcha harakatlarimizning negiziga qo'yildi. Hayotimizda “Davlat insonlar uchun” degan xalqchil g'oya izchillik bilan qaror topib bormoqda”. Bu xalqchil g'oya o'z mohiyatiga ko'ra, milliy taraqqiyotimizda inqilobiy o'zgarish yasab, Yangi O'zbekistonning ta'limotiga aylanmoqda. Ayniqsa, Yangi O'zbekiston “inson+jamiyat+davlat” tamoyili Prezidentning tashabbusi ila Asosiy Qonunimizda mutlaq o'rin olib, uning ta'limoti tamoyiliga aylandi.
Prezident Shavkat Mirziyoyev inson va jamiyatga hozirgi talab, Yangi O'zbekiston strategiyasi nuqtai nazaridan sharh berar ekan, Konstitutsiyamizning 13-moddasida qayd etilgan: “O'zbekiston Respublikasida demokratiya umuminsoniy prinsiplarga asoslanadi, ularga ko'ra inson, uning hayoti, erkinligi, sha'ni, qadr-qimmati va boshqa ajralmas huquqlari oliy qadriyat hisoblanadi”, degan qoidaga amaliy javob sifatida insonni birinchi o'ringa qo'ydi. Yoxud 14-moddadagi “Davlat o'z faoliyatini inson farovonligini va jamiyatning barqaror rivojlanishini ta'minlash maqsadida qonuniylik, ijtimoiy adolat va birdamlik prinsiplari asosida amalga oshiradi”, degan fikr oq qog'ozga qora harflar bilan yozib qo'yilishini endi anglab yetdik. Darvoqe, Prezidentning ushbu ochiq va haqqoniy ta'biri — “Inson qadri uchun” uning o'ta novator tashabbusi bo'lib, strategik ta'limot sifatida Yangi O'zbekiston taraqqiyotining birlamchi, ayni paytda hal qiluvchi omiliga aylanadi.
Shunday qilib, davrlar o'taveradi, zamonlar o'zgaraveradi. Biroq xalqona dunyoqarash, inson va shaxsning ma'naviy-ilohiy-ruhiy qiyofasi, mohiyat va mazmuni avloddan-avlodga o'tib, yangi bo'yoqlar, mo''jizalar kasb etgan holda davom etaveradi. Bu boqiy va uzluksiz jarayon Yangi O'zbekiston fenomeni sifatida fuqaro his-tuyg'ulari, aqidalari va munosabatlari hamda ilohiy-ruhiy olami — yuksaklikni o'zida ifoda etadi.
Xullas, inson+shaxsning jamiyatdagi o'rni, ularning mushtarak holda faqat insonga atrof-voqelik hamda odobu axloq qoidalari haqida bilim berishning o'zi, uning ma'naviy-axloqiy tarbiyasi uchun yetarli bo'lmaydi. Unda iroda qudrati, mas'uliyat va burch, majburiyat tuyg'usini shakllantirish, ko'ngilda atrof-tabiatga, mehnatga, kasbga, ilmga, o'zga insonlarga mehr uyg'otish, dilida ulug' maqsadlar tug'ilishiga erishish lozim. Har bir insonda Vatan, millat, adolat tuyg'ulari ruhidagi poydor ma'naviy qadriyatlarga aylanishi uchun o'zgalar ibratida sinashi, bu yo'lda riyozat chekishi, ularga nisbatan ko'ngilda mehr uyg'onishi zarur! Bunga turli yo'llar, turli vositalar bilan birinchi navbatda, yosh avlod tarbiyasiga samimiy (chin ko'ngildan) va izchil yondashuv; ikkinchidan, tinimsiz izlanishlar bilan erishiladi.
Prezident Shavkat Miromonovich Mirziyoyev rahbarligida muvaffaqiyatli amalga oshayotgan demokratik islohotlar — Yangi O'zbekiston ta'limoti bu borada oqilona ish tutilayotganini isbotlamoqda. Aslida kadrlar, rahbar kadrlar mana shu chizgilarda asliyatga aylanadi.
Ushbu essening bosh maqsadi va vazifasi Prezidentning xalqona qarashlari, har jihatdan kadrlar muammosi barcha sohalar va jabhalarda sodir bo'lishi muayyan darajada o'z aksini topadi. Bu jadid bobolarning, milliy taraqqiyot daholik tilsimining, qaror topayotgan Yangi O'zbekistonning barcha jihatlarida namoyon bo'lishi — uzun istiqbol chizig'i bo'lsa, uning bir tutumga kelishi esa muhtaram Shavkat Mirziyoyev qo'lidan, qalbidan, butun vujudidan o'tishi — yakuniy xulosa “O'zbekiston-2030” strategiyasi orqali yetti yilda jahon hamjamiyatida o'ta ilg'or davlatlar safiga qo'shilishi oliy maqsad va vazifa, amalga oshirilishi zaruratga aylanadigan hodisa — voqelikdir.
Prezidentning ularga nisbatan yuksak orzu-tilagi: “Barcha bo'g'indagi rahbarlarga chiroyli, balandparvoz gapiga qarab emas, faoliyatning aniq natijasiga qarab baho beramiz.
Qonunlarni, odamlarni mensimaydigan, ularga qo'pol munosabatda bo'ladigan, byurokratiya va korrupsiya balosiga berilgan har qanday rahbar bilan — u vazir yoki hokim bo'ladimi, boshqa mas'ul vazifadagi amaldor bo'ladimi — salbiy harakatlari bilan davlat obro'siga putur yetkazayotgan bunday kishilar bilan uzil-kesil xayrlashamiz. Ularning o'rniga bilimli, Vatan va xalq tashvishi bilan yashaydigan yosh-yosh yigit-qizlarni qo'yamiz”.
Safimizga yurtimizdagi, chet eldagi nufuzli oliygohlarda o'qigan, yirik kompaniyalarda ishlagan qanchadan-qancha salohiyatli yoshlar kirib kelmoqda. Men ularning timsolida, avvalo, ertangi kunimizning yangi rahbarlarini, hudud, tarmoq va sohalarning mohir boshqaruvchilarini ko'raman”.
Darvoqe, keyingi yillarda O'zbekiston iqtisodiyoti qariyb ikki barobar o'sdi. Mamlakat 2023 yilni 6 foizlik o'sish bilan yakunladi va bu yil ham xuddi shunday muvaffaqiyatga erishishi kutilmoqda. Inflyatsiya darajasi 9 foizga tushgan. Tovar ayirboshlash ko'rsatkichlari ham muttasil ortib bormoqda. Mamlakat valyuta bozori va oltin valyuta zaxiralari barqarorligini saqlab kelmoqda. Oxirgi yillarda 60 milliard dollardan ortiq xorijiy investitsiyani jalb etishga muvaffaq bo'lindi. O'tgan yili xorijiy investitsiyalar hajmi qariyb ikki barobarga oshdi.
O'zbekiston 90 dan ortiq davlat, jumladan, Turkiyada ham amal qilayotgan vizasiz rejim tufayli turizm sohasida o'z nomini yuksaltirmoqda. Shunday qilib, buyuk tarixiy poydevorlarga tayanib yuksalish va rivojlanishni maqsad qilgan Yangi O'zbekiston nafaqat Markaziy Osiyo, balki butun dunyoning yorqin yulduziga aylanib bormoqda.
Zero, Shavkat Mirziyoyevning: “Inson qadrini ulug'lash, aholimiz manfaatlarini ta'minlash, buning uchun kuchli iqtisodiyot barpo etish bizning asosiy vazifamizdir. Iqtisodiyotimizga xorijiy investitsiyalarni jalb etish, tadbirkorlik va xususiy mulk uchun keng imkoniyatlar yaratishni yanada kuchaytiramiz. Ilm-fan, innovatsiya, ІT kabi sohalarni, “yashil” va raqamli texnologiyalarni rivojlantirishga alohida e'tibor qaratamiz. Ijtimoiy sohalar rivojini mutlaqo yangi bosqichga ko'taramiz.
Vatanimiz mustaqilligini mustahkamlash, Qurolli Kuchlarimiz jangovar salohiyatini oshirish ustuvor vazifamiz bo'lib qoladi.
Muxtasar aytganda, yangi hayotni, Yangi O'zbekistonni barpo etish uchun bor kuch va imkoniyatlarimizni to'liq safarbar etamiz”, degan gaplari bejizga aytilmagan.
Karim NORMATOV,
tarix fanlari doktori,
Qurolli Kuchlar Akademiyasi
professori.