Ko'lami katta ishlar bo'sag'asida…
Prezidentimizning shu yil 19 iyunda Qashqadaryo viloyatiga qilgan navbatdagi tashrifi samimiy muloqotlar, unutilmas voqealarga boy bo'ldi
Atrofga boqsangiz, har kuni o'zgarish, yana bir yaxshi yangilikka guvoh bo'lasiz. Kechagi kundan bugun yaxshiroq yashamoqni, bugunidan ertasi yaxshi bo'lishini yer yuzida yashayotgan har bir kishi istaydi. Ammo hozirgi shiddatli kechayotgan zamonda bu oson emas. Bu har bir sohada islohotni talab etadi. Islohotki, raqobatbardosh bo'lmog'i kerak. Islohot uchun tafakkur qilinmog'i, reja va maqsadlar sari dadil odimlar zarur. Mehnat mahsuli esa yuqorida ta'kidlaganimiz yaxshi yashamoqqa olib boradi.
Yaxshi yashash uchun shinam uy, xotirjam oila davrasi, bolalar kamoloti uchun ishonchli maskan talab etiladi. Bularni biror oila vakili bir o'zi yarata olmaydi. Bu bevosita jamiyat bilan uzviy bog'liq. Siz yashayotgan jamiyatda o'zgarishlar, yangilanishlar bo'laversa, sizning ham rejalaringiz yangilanib, hayotingiz yaxshilanib boraveradi. Yurtimizning qaysi hududiga bormang, yangilik, odamlar yashash tarzining yanada yaxshilanib borayotganiga guvoh bo'laciz. Nafaqat oila kattalarining, balki yosh avlodning ham orzu, reja va maqsadlari aniq. Bu muloqotlar jarayonida tilga chiqadi. Yurt rahbarining shu yil 19 iyundagi Qashqadaryo viloyatiga tashrifi samimiy muloqotlar bilan boshlandi.
Qarshi shahridagi “Alp texno servis” eksportchi korxonasi faoliyati juda keng. Qiymati 10 million dollar bo'lgan mazkur loyiha elektr texnikasi yo'nalishida ish yuritadi. Qashqadaryo viloyatida televizor ishlab chiqariladi, desa, birov ishonmas edi. Ammo bu — islohotning natijasi. Hozir korxona xorijiy “TSL”, “HOFFMANN” brendlari uchun buyurtmalar tayyorlab bermoqda. Shuningdek, mahalliy “SMART” brendiga asos solingan. Shu nomlar ostida yiliga 500 ming donagacha televizor va elektron platalar ishlab chiqarilmoqda.
Davlatimiz rahbari muloqot davomida bu tarmoqni yanada rivojlantirish zarurligini ta'kidladi.
— Bu sohada tajriba orttirdik, tashqi bozorga yo'l topdik. Endi bu korxonani kengaytirish kerak. Odamzod bor ekan, bunday mahsulotlarga talab bo'ladi. Faqat sifat va nomenklatura bo'yicha o'sish, raqobatbardosh bo'lish zarur, — dedi Shavkat Mirziyoyev.
Korxonada 200 kishi ish bilan ta'minlangan. Qarshi davlat texnika universiteti bilan dual ta'lim yo'lga qo'yilgan. Yoshlar ham o'qish, ham amaliy jihatdan munosib kadr bo'la olishyapti.
Bu viloyatdagi tashrif davomida uchrashuv manzilining birinchisi edi.
Davlatimiz rahbari Qarshi shahridan Shahrisabzga ketayotib, poezdda qashqadaryolik faollar bilan samimiy muloqotda bo'ldi. Yo'ldagi suhbatlar, atrofni kuzatish, xolis bir nazar solish, rejalarni qayta ko'zdan kechirish, g'oyalarni muhokama qilish, shu hudud odamlari fikrini eshitish, ular uchun qanday qilsa yanada yaxshi bo'lishini bilish, bir so'z bilan aytganda, dardini eshita olish fursatlari bo'ldi. Bu ham yo'lovchi bo'lish, ham yurtimizga kelgan xorijiy mehmonlarning nigohi bilan qarashni anglatdi. Zukko rahbar fursati bilan yo'lda ham, poezdda ham fikrlashadi, ularga g'oyalar beradi, maqsadlarni aniqlashtiradi, masalalarni muhokama qila oladi. Biz buni katta hayajon bilan kuzatib turdik.
Masalalar yuzasidan topshiriqlar berildi. Bugun bu topshiriqlar bo'yicha Qashqadaryoda amaliy ishlar boshlab yuborilgan.
Yurtboshimiz tashrif buyurgan keyingi manzil Shahrisabz shahridagi ko'p tarmoqli kardiologiya markazi bo'ldi. Rossiyalik tadbirkor bilan hamkorlikda tashkil etilgan “Oq saroy” klinikasi yaqinda ishga tushdi. Bu yerda 4 ta jarrohlik va 6 ta reanimatsiya xonalari, 100 dan ortiq shifo o'rinlari mavjud. Bir vaqtning o'zida 4 ta va kuniga 25 tagacha yuqori texnologiyali kardiojarrohlik amaliyotlarini o'tkazish imkoniyati yaratilgan. Buning uchun Rossiya, Turkiya va Quvaytdan malakali shifokorlar ishga jalb etilgan. Stentlash, aorta koronar shuntlash, tug'ma nuqsonlarni bartaraf etish, endoprotezlash kabi davolar samarasi yuqori.
Markaz yuqori aniqlikda tashxis xizmati ham ko'rsatadi. Masalan, zamonaviy exokardiografiya uskunasi sun'iy intellekt yordamida ishlaydi. Bunaqasi hozircha O'zbekistonda yagona. Sun'iy intellektdan samarali foydalanish sohada innovatsiyaning qanchalik natijadorligini ko'rsatmoqda.
— Bu yerdagi tizimni andoza qilib olib, 14 ta hududimizda shunday klinikalar tashkil etish zarur. Bunga qancha mablag' kerak bo'lsa, topamiz. Faqat zamirida xalqimiz uchun kafolatlangan sifatli davo bo'lishi lozim. Muqobillik, raqobat bo'lmasa, sifatga intilish bo'lmaydi, — dedi Shavkat Mirziyoyev.
Mutasaddilarga bu borada taklif tayyorlash, klinikalarni birlamchi bo'g'in va tibbiy sug'urta tizimi bilan uyg'unlashtirish bo'yicha ko'rsatmalar berildi.
Shifoxonada 130 ta ish o'rni yaratilgan. Yana bir jihati, malakali mutaxassislar tayyorlash uchun shu yerning o'zida klinik ordinatura yo'lga qo'yilgan.
Prezidentimiz bunga alohida ahamiyat qaratib, talaba va shifokorlarning malakasini oshirish, xorijlik mutaxassislar bilan telemeditsinani kengaytirish muhimligini ta'kidladi.
Markaz tomonidan mobil diagnostika mashinalari yo'lga qo'yilgan bo'lib, chekka hududlardagi aholiga UTT, MSKT, EKG kabi tibbiy xizmatlarni ko'rsatadi. Yana bir islohot. Tasavvur qiling, uyidan, ro'zg'oridan, dala ishlaridan, chorvadan vaqt ajratib, do'xtirga borolmagan kishining yoniga mobil diagnostikaning o'zi kelib tursa, bundan u albatta unumli foydalanadi. O'zi haqida qayg'uradi. Uning salomatligini o'ylagan, g'amxo'rlik qilayotgan davlatidan minnatdor bo'ladi. Bu ham Qashqadaryoda shu kecha-kunduzda olib borilayotgan islohotlardan.
Prezident Shavkat Mirziyoyev Yakkabog' tumanida barpo etilgan “Yangi O'zbekiston” massivida ham bo'lib, u yerdagi yangilanishlar bilan tanishdi.
Yakkabog' tumanida barpo etilgan “Yangi O'zbekiston” massivi ko'rgan ko'zni quvontiradi. 18 gektar maydonni egallagan massivda 54 ta besh qavatli uy qurilgan. Bu 1 ming 400 ta xonadon aholiga taqdim etiladi. Bu hududni o'zingiz kelib ko'rmasangiz bo'lmaydi. Zamonaviy arxitektura, infratuzilmaning qulayligi shundoq ko'rinib turibdi. Ozoda, ko'rkam, batartib binolarning bolalar maydonchalari va avtoturargohlari bor. Bu bolalar maydonchalarida o'zimizning bolajonlar o'ynaydi, do'st bo'ladi, ulg'ayadi. U ham shu Vatanga fidoyi inson bo'lib xizmat qiladi. Qaytar dunyo, deyishadi-ku. Yaxshilikni, go'zallikni ko'rgan, yaxshilikdan suv ichgan inson, albatta, qalban yaxshi inson bo'ladi. Men bunga ishonaman.
Hududda qurilgan uch qavatli “Ekobozor”da mahalliy dehqonlar o'z mahsulotlarini to'g'ridan-to'g'ri iste'molchilarga yetkazish imkoniga ega. Bu esa ham sifat, ham narx jihatidan odamlarga ma'qul bo'lmoqda. Bozorda 640 ta ish o'rni yaratilgan.
Davlatimiz rahbari ushbu ekobozorda yaratilgan sharoitlarni ko'zdan kechirdi, sotuvchi va xaridorlar bilan muloqot qildi.
— Bozorlar to'kinlik, farovonlik va xalqning madaniyatini ko'rsatadi. Yakkabog'da shunday obod maskan bunyod etilgani quvonarli. Xalqimizning xarid qobiliyati, bozor madaniyati oshyapti. Shunga munosib bunday qulay savdo markazlarini ko'paytirish kerak, — dedi Prezident.
Hududda energiya tejamkorligi va uzluksizligi, ekologik xavfsizlik ta'minlangan. Qanday deysizmi? Massivdagi infratuzilma inshootlariga quyosh panellari va geliokollektorlar o'rnatilgan.
Aholining dam olishi, bolalar va yoshlarning faol vaqt o'tkazishi uchun ham qulayliklar yaratilgan. Xususan, sayilgohlar, bolalar bog'chasi, sport maydonlari, sog'lomlashtirish maskanlari hamda servis nuqtalari yagona konsepsiya asosida barpo qilingan.
Prezident Shavkat Mirziyoyevning yana bir uchrashuv manzili Shahrisabz tumani Hisor tog'i yon bag'ridagi sayyohlik hududlari bo'ldi.
O'zbekiston Respublikasi Prezidentining 2023 yil 28 noyabrdagi qarori asosida Qashqadaryo viloyatining tog'li-rekreatsion hududlarida zamonaviy xizmat ko'rsatish va turizm majmualari barpo etilmoqda. Jumladan, xorijiy davlatlarning malakali ekspertlari va yetakchi kompaniyalari ishtirokida Miraki, Amir Temur, Uloch va Polmon mahallalarida sayyohlar uchun qulayliklar yaratilmoqda. Umumiy 240 gektar maydonda 400 million dollarlik 117 ta loyiha amalga oshirilayotir. Buning natijasida esa 1 ming 700 ta doimiy ish o'rni ochiladi. Katta raqamlar, katta ishlar ortida katta mehnat turibdi. Katta dovonlarni oshib o'tayotgan Qashqadaryo bu.
Bugun Mirakidagi o'zgarishlar mazkur qaror va turizm bo'yicha o'tkazilgan yig'ilishlar, olib borilgan samarali mehnat natijasi. Bu manzil yaxlit turizm klasteriga — “Miraki” xalqaro turizm markaziga aylandi.
Oqsuv daryosining ikki qirg'og'i bo'ylab piyoda va velosipedda yurish uchun o'n kilometrlik “eko yo'lak” tashkil etilgan. Bolalar maydonchasi, ko'ngilochar bog', nuroniylar maskani, oilaviy mehmon uylari hamda ko'chma savdo shoxobchalari mahalla ko'rkini oshirgan.
— Shahrisabzning ustun tarafi — yil davomida sayohatga kelish mumkin. Buning uchun yo'l, kommunikatsiya, mehmonxonalar quryapmiz. Endi xizmat turlarini ko'paytirishni o'ylash kerak. Masalan, Mirakiga kelgan mehmon vaqtini qanday o'tkazadi, nimalar xarid qiladi? Shu talablardan kelib chiqib, xizmatlar taklif qilish, bu yerning tabiati va sharoitini chet ellarda keng targ'ib etish kerak, — dedi Shavkat Mirziyoyev.
Bunday keng qulayliklar Qashqadaryoga keluvchi sayyohlar sonini oshiradi. Kelgan sayyoh uchun ham, Vatan ichra sayr qilgan yurtdoshimiz uchun ham o'zgarishlar xursandchilik olib keladi. Atrofni kuzatib, sayohatga borgan kishining bahri-dili ochilsa, albatta, bu manzilga takror keladi. Taassurotlarini do'stlariga aytadi. Borgan manzilidan, yurgan yo'lidan rozi bo'ladi. Bu obodliklar bir kunda yaratilmadi. Buning ortida qancha mehnat, islohot bor.
Prezident Shavkat Mirziyoyev Shahrisabz tumanidagi “Hisorak” suv ombori yaqinida barpo etilgan Hisorak kichik gidroelektr stansiyasini ko'zdan kechirdi. Bu yerda ishlab chiqariladigan elektr energiya 7 ming 300 ta xonadonga yetadi.
Davlatimiz rahbariga daryo suvidan energiya olish bo'yicha kelgusi rejalar haqida axborot berildi.
Hozirda viloyatda umumiy quvvati 49 MVt bo'lgan 3 ta GES faoliyat yuritmoqda. Istiqboldagi loyihalar tufayli bu ko'rsatkich sezilarli darajada oshishi kutilmoqda. Gidroenergetika orqali viloyatda aholi elektr energiyasi iste'molining 15 foizini qoplash maqsad qilingan.
Mamlakatimizda so'nggi sakkiz yil ichida elektr energiyasi ishlab chiqarish 38 foizga oshib, 81,5 milliard kVt/soatga yetdi. Joriy yilda respublika bo'ylab umumiy quvvati 24,7 MVt bo'lgan 5 ta yangi kichik GES foydalanishga topshirilishi rejalashtirilgan.
Aziz zamondosh, Italiya, Fransiyaning landshaftli bog'lari, qir-adirlaridagi tokzorlarini ko'rganmisiz? O'shanday hudud Shahrisabzda bor.
Davlatimiz rahbari Qashqadaryoga tashrifi chog'ida ushbu agroturizm majmuasini borib ko'rdi.
Majmua 520 gektardan iborat bo'lib, adirlik qismida “terrasa” usulida uzum, gilos va olma ekilgan hamda o'rmon barpo etilgan. Fransiyadan eng sara navlar olib kelingan.
— Cho'l-adirlarni o'zlashtirishimizga shubha qilganlar shu bog'ni kelib ko'rsin, — dedi Prezident.
7,5 ming tonna mahsulot yetishtirish imkoniyatiga ega majmuaning eksport quvvati 5 million dollarga teng. 100 ta doimiy va mingdan ortiq mavsumiy ish o'rni yaratilgan. Ko'chatlar rivojini fransiyalik mutaxassis kuzatib boradi, yoshlarga dehqonchilik sirlari va bozor talablarini o'rgatadi.
Hududda, shuningdek, 120 o'rinli restoran va 100 o'rinli mehmonxona qurilgan. Agrologistika va o'quv markazi, qayta ishlash, saqlash quvvatlari qurilmoqda.
Mutasaddilar bunday bog'larni kengaytirish, boshqa tog'li tumanlarda ham tashkil etish rejalari haqida aytdi. Davlatimiz rahbari sug'orishni tashkil etib, bog'larni aholiga bo'lib berish, odamlarga daromad manbai yaratish bo'yicha topshiriqlar berdi.
Bir nihol ekib, uning daraxt bo'lishi zahmatini bog'bondan ko'ra hech kim yaxshiroq bilmasa kerak. Butun bir mevali daraxtlarning sara navlari, bog'dorchilik hamda ilm bilan yaratilgan yashil manzarani ko'rgan kishining qoyil qolishdan boshqa imkoni yo'q.
Yurtimizda jadal rivojlanish dasturiga kirgan tumanlarda “Islohotlar shtabi” tuzilmoqda. Shahrisabz, Yakkabog' va Ko'kdalada ishga tushgan yangi loyihalar bunda tayyor andoza ekanligi qayd etildi. Endi shunday shtab Qashqadaryoda ham bo'lishi belgilandi.
Davlatimiz rahbari viloyatni har tomonlama rivojlantirish bo'yicha qo'shimcha imkoniyatlarni ko'rsatib o'tdi.
Yurt rahbarining har bir viloyatga safari ana shunday izchil, dolzarb masalalarga yechim berish, yangi g'oyalar, yuksalishni rag'batlantirish, kelajak uchun yangi odimlar ila kechadi.
Ko'lami katta ishlar oldida turibmiz. Islohotlar samarasi o'zini ko'p kuttirmaydi. Bu odamlarimiz turmush sharoitining yaxshilanishiga olib keladi.
— Ko'rib turganingizdek, Qashqadaryoda rejalashtirgan ishlarimiz ko'p. Amir Temurdek buyuk ajdodimizdan jasorat, matonat, bag'rikenglik kabi fazilatlarni meros qilib olgan mehnatsevar, samimiy va oliyjanob viloyat ahli bilan oldimizga qo'ygan ulkan marralarga albatta erishamiz. Aminmanki, qashqadaryoliklar barcha islohotlarimizning oldingi safida bo'ladi, — dedi Shavkat Mirziyoyev.
Yig'ilishda muhokama qilingan masalalar yuzasidan viloyat va tuman hokimlari, tarmoq rahbarlari axborot berdi, tadbirkorlar va jamoatchilik vakillari bilan muloqot qilindi. Muloqotki, samimiyatga yo'g'rilgan.
Tashrif barcha soha vakillari qatori biz ijodkorlarni ham ilhomlantirdi. Biz ham o'z ishlarimiz sarhisobini qiladigan bo'lsak, O'zbekiston Yozuvchilar uyushmasi viloyat bo'limi tomonidan har yili qator tashkilotlar bilan hamkorlikda yil davomida uyushma tashabbusi bilan 200 ga yaqin ma'naviy-ma'rifiy tadbirlar, ijodiy uchrashuvlar, davra suhbatlari, ijodiy tanlovlar va yangi kitob taqdimotlari o'tkazib kelinadi.
O'zbekiston Yozuvchilar uyushmasi Qashqadaryo viloyat bo'limi qoshida 11 ta ijodiy to'garak ochilgan. “Qashqadaryo ilhomlari”, “Iste'dod chorlovi”, “Nasaf oqshomlari”, tumanlarda “Abdulla Oripov izdoshlari”, “Mitti buloqlar”, “Qalamkashlar”, “Nasaf ilhomlari”, “Umid uchqunlari”, “Yosh qalamkashlar”, Qarshi davlat universiteti qoshida “Yosh ijodkorlar” deb nomlangan adabiy to'garaklar faoliyat yuritmoqda.
Shahrisabz davlat pedagogika institutida “Yuzma-yuz” ijodiy to'garagi tashkil qilingan. To'garak a'zolar soni 162 nafardan iborat. Mashg'ulotlar bir oyda ikki marotaba o'tkaziladi.
To'garaklar faoliyati davomida viloyat ijodkorlarining ijod namunalari tahlil qilinadi, saralanadi. Kamchiliklarni tuzatish bo'yicha tavsiyalar beriladi.
O'zbekiston Yozuvchilar uyushmasi homiyligida shu kungacha Bo'ritosh Nosirovaning “Armug'on”, Xosiyat Lutfullayevaning “E'zoz abadiyati”, Lola O'roqovaning “Qo'ng'iroq”, Ne'mat Arslonning “Yozuvchi uchun atir”, Ibrohim Muhammadning “Dengizga termulgan qiz” va Jamshid Haqberdiyevlarning kitoblari chop etildi.
Hududiy bo'lim tashabbusi bilan har yili qator badiiy kitoblar nashr etib kelinmoqda. Jumladan, 2025 yilda to'garak a'zolarining “Qashqadaryo yoshlar bayozi”, Murod Zaripovning “Qalb yog'dusi”, Davron Sultonning “Maktub”, Shuhrat Sayyidning “Yurtim yoxud jadidlar”, Dilfuza Normatovaning “Orzular yo'li”, Xurshida Sharopovaning “Yurakka yo'l” hamda Latofat Amirovaning “Yo'lovchi” deb nomlangan kitoblari nashr qilindi. 2022 yildan hozirga qadar 52 nafar ijodkorning kitoblari nashrga tayyorlanib, o'z mablag'lari hisobidan nashr qilindi.
Respublika yosh ijodkorlarining Zomin an'anaviy seminarida ishtirok etish istagida bo'lgan yoshlar soni yildan-yilga ortib bormoqda. Birgina 2024 yilda 51 nafar yosh ijodkor hujjat topshirgan bo'lsa, joriy yilda bu raqam 67 nafarga yetdi.
Olti nafar qashqadaryolik ijodkor-yoshlar Shohruh Usmonov “Tadorik”, Zikrilla Mamatov “Umidli dunyo”, Gulsevar Umrzoqova “Yomg'ir”, Durdona Bobomurodova “Mahzunim”, Bibigul Adiyeva “Xayol kemasi”, Muhammadali G'afforovlarning “Ishq safari” nomli ilk kitoblari O'zbekiston Yozuvchilar uyushmasining “Mening birinchi kitobim” loyihasi dasturida 10 ming nusxada chop qilindi.
Bundan tashqari, Zomin seminariga, ikki yildirki, kvota asosida Prezidentimiz tashabbusi bilan Abdulla Oripov ijod maktabidan ham 5 nafar iqtidorli yoshlar ishtirok etib kelmoqdalar.
Quvonarlisi, Zulfiya nomidagi Davlat mukofotining adabiyot yo'nalishi bo'yicha Rohilabonu G'o'chchiyeva (2022), Ma'mura To'rayeva (2023) hamda Madina Muhammadrizayevalar (2025) ushbu yuksak mukofotga sazovor bo'ldilar.
Abdulla Oripov ijod maktabida O'zbekiston Yozuvchilar uyushmasi a'zolari tomonidan har yili 15 ga yaqin mahorat darslari va ijodiy uchrashuvlar tashkil qilinmoqda.
O'zbekiston Respublikasi Mudofaa vazirligi huzuridagi Jamoatchilik kengashi bilan bevosita hamkorlik asosida viloyatimizdagi harbiy qismlar va “Temurbeklar maktabi”da ham 40 ga yaqin ijodiy uchrashuvlar, kitobxonlik tadbirlari tashkil qilinmoqda.
Bundan tashqari, Prezidentimizning “Yetim bolalar va ota-ona qaramog'idan mahrum bo'lgan bolalarni tarbiyalashning tubdan yangilangan tizimini joriy etish chora-tadbirlari to'g'risida”gi qarori ijrosini ta'minlash maqsadida yil davomida viloyatdagi “Oilaviy mehribonlik uylari” tarbiyalanuvchilari bilan har oyda bir marta uchrashuvlar tashkil etilib, ularga yaratilgan sharoitlar bilan yaqindan tanishib, bolalar holidan xabar olib kelinmoqda, kitoblar sovg'a qilinyapti.
Viloyat bo'limida qardosh xalqlar adabiyoti vakillari bilan xalqaro adabiy-badiiy aloqalar ham keng yo'lga qo'yilgan. Qozog'iston, Qirg'iziston va ozarbayjonlik shoir va yozuvchilarning asarlari jamlangan “Qozoq-o'zbek ijodkorlari”, “Qirg'iz-o'zbek ijodkorlari” antologiyalari ikki tilda chop etildi.
O'zbekiston Yozuvchilar uyushmasi tomonidan uyushma a'zolari Dilrabo Boboqulova, Norqizil Kengboyev, Hafiza Egamberdiyeva va Ibrohim Paydoyevlarga bir martalik moddiy yordam ko'rsatildi.
Har yili O'zbekiston Yozuvchilar uyushmasi tomonidan viloyat bo'limiga ajratiladigan 2 mingga yaqin adabiy-badiiy, ijtimoiy-siyosiy kitoblar yil davomida o'tkazilgan tadbirlarda ishtirokchilarga bepul tarqatiladi.
2021 yilgacha viloyatimizda O'zbekiston Yozuvchilar uyushmasi a'zolari soni 34 nafarni tashkil etgan bo'lsa, hozirda a'zolarimizning safi bir barobarga oshib, 62 nafarga yetdi.
2025 yilda Yozuvchilar uyushmasi viloyat bo'limi faoliyatini yanada rivojlantirish uchun bir qator reja-dasturlar ishlab chiqilgan.
Jumladan:
– “Yashil makon” umummilliy davlat dasturiga asosan viloyatimizda yashab ijod qilayotgan shoir-yozuvchilar va ijodkorlarning ma'naviy hordiq olishlari va turli tanlovlar, “Nasaf oqshomlari” mushoira kechalarini o'tkazish uchun “Ijodkorlar bog'i”ni tashkil etish;
– viloyatimizda yashab ijod qilgan va ijod qilib kelayotgan taniqli adib va shoirlarning ijodiy merosini yanada chuqurroq o'rganish maqsadida maktab o'quvchilari, talabalar va ijodkorlar o'rtasida “Adabiyotimiz iftixori” nomli adabiy tanlov tashkil qilish;
– iqtidorli ijodkor yoshlarni ma'naviy qo'llab-quvvatlash maqsadida ularning kitoblarini chop etishda amaliy yordam ko'rsatish;
– viloyat bo'limi tashabbusi bilan Qarshi shahridagi mahallalarda yangi loyiha — kutubxonalar tashkil qilish mo'ljallangan.
Rejalarimiz bisyor. Prezidentimiz qo'llab-quvvatlamoqda, elimizga ziyo, ma'rifat ulashishga munosib hissa qo'shish, ma'naviyati boy xalqimiz bilan milliy an'analarimizni qadrlagan holda jahonga chiqmoq, adabiyot bilan, so'z bilan qadr topmoq asosiy maqsadimizdir.
G'ulom ABDIYEV,
O'zbekiston Yozuvchilar
uyushmasi Qashqadaryo viloyati
bo'limi rahbari.