Qo'qon shamollari

Yaqinda tarixiy shahar Qo'qonda bo'ldim. Shahar hokimi Ma'rufjon Usmonov bilan suhbatlashdik. Qo'qon juda go'zal shahar. Shuning uchun bu kent “Xo'qandi latif” deb bejiz atalmagan-da. Chindan ham latif – chiroyli, sehrli, tarixiy makon. Poytaxtdan “bir qadam” joyda bo'lsa ham, tez-tez kelishning imkoni bo'lavermaydi. Shahar keyingi yillarda yanada obod, ko'rkam bo'libdi.

— Qo'qon shahrida qanday o'zgarishlar bo'lsa, hurmatli Prezidentimiz Shavkat Mirziyoyevning vatanparvarlik, millatparvarlik va xalqparvarlik yo'lidagi farmonlari va qarorlari ijrosi tufaylidir, — dedi faxr bilan shahar hokimi. — Biz esa shahrimizdagi islohotlar va uning samarasini har bir inson, har bir oila o'z hayotida ko'rishi uchun Prezidentimiz belgilab bergan yo'l-yo'riqlar bo'yicha harakat qilyapmiz, xolos.

— Yaqinda Qo'qon shahrida uchinchi Xalqaro hunarmandchilik festivali yuqori darajada o'tkazildi, — dedi Ma'rufjon Usmonov. — Ushbu festival milliy hunarmandchilik an'analarimizni rivojlantirish, hunarmandlarni har tomonlama qo'llab-quvvatlash, boy madaniy merosimizni dunyoga targ'ib qilish va shu orqali jahondagi turli milliy madaniyat va qadriyatlarni yaqinlashtirish maqsadida har ikki yilda o'tkazilmoqda. Yaqinda bo'lib o'tgan hunarmandchilik festivalida o'nlab xorijiy davlatlardan ishtirokchilar qatnashdi. Mamlakatimizdan yetti yuz nafardan ortiq hunarmandlar ijodiy ishlarini namoyish etishdi, o'zaro tajriba almashishdi.

Shahar kattakoni tadbirkorlarga yaratilayotgan imtiyozlar, zamonaviy uy-joylar qurilishi, ta'lim samaradorligini oshirish, “yashil makon”lar yaratish, kambag'allikka qarshi kurashish, yangi ishchi o'rinlari tashkil etish — bularning hamma-hammasi Vatan uchun, millat uchun, xalq uchun amalga oshirilayotgan xayrli ishlar ekanini alohida ta'kidladi.

Qo'qon azal-azaldan olimu ulamolar, fozilu fuzalolar shahri bo'lib kelgan. Ziyoga, ma'rifatga ixlos bu yerliklarning qon-qonida bor. Mamlakatimizda dastlabki nodavlat universitet ham ilk bor Qo'qonda ochilgani bejiz emas. Albatta, bugungi kunda xususiy oliy ta'lim o'choqlari nafaqat poytaxtimiz Toshkentda, balki barcha viloyatlarda mavjud. Shunday qilib, shahar hokimi tavsiyasiga ko'ra hokimlikning matbuot kotibi Ulug'bek Norbayev hamrohligida Qo'qon universitetida bo'ldik.

Universitet olimlari samimiy va tavozeli kishilar ekan. Yuzlaridan beg'uborlik ketmagan o'g'il-qiz talabalar qo'llari ko'ksida “Assalomu alaykum!” deyishib yoningizdan o'tishadi.

Ayniqsa, suxanidan ziyo va hurmat nafasi kelib turgan universitetning yoshlar masalalari bo'yicha prorektori Sherzod Dehqonovning suhbatida bo'lgan kishi dili yorishadi.

— Universitetimiz O'zbekistonda birinchi ochilgan nodavlat oliy ta'lim muassasalaridan biri, – dedi u. — Bugun ta'lim maskanimizda 12 mingga yaqin talaba tahsil olmoqda. Qisqa muddatdayoq zamonaviy infratuzilmasi, xalqaro hamkorlik aloqalari, ta'lim sifati bo'yicha nafaqat mamlakatimizdagi, balki mintaqadagi eng faol nodavlat oliy ta'lim muassasasiga aylandi.

Universitetdagi keng va qulay auditoriyalar, zamonaviy kutubxona, axborot texnologiyalari markazi, laboratoriyalar bilan tanishib, o'quv jarayonlari eng ilg'or talablar darajasida tashkil etilganiga guvoh bo'ldik. O'quv zali devoriga Abdullo Rudakiyning “Ilmdan yaxshiroq xazina bo'lmas, qo'lingdan kelgancha tera olsang bas” degan hikmati yozib qo'yilibdi. Ha, bu xazinadan bahramand bo'lish ne'matiga muyassar bo'la olgan yoshlarga havasimiz keldi.

Ayniqsa, turizm yo'nalishi bo'yicha tahsil olayotgan talabalarning baxti kulibdi. U yerdagi shart-sharoitlar va go'zal manzaralardan zavqim oshib, hamrohimga: “Qaniydi, yoshlikka qaytib qolsam-u, men ham shu dargohda ta'lim olsam”, dedim. Nasib etsa, nabiralarimdan birini Qo'qon universitetining turizm yo'nalishida o'qitmoqlik istagi tug'ilganini yashirmadim.

— Talabalarning bilim olishga bo'lgan qiziqishini oshirish maqsadida davlat tomonidan eng iqtidorli abiturientlar uchun maxsus grant o'rinlari ajratilmoqda, — deb so'zini davom ettirdi oliy ta'lim maskani prorektori. — O'tgan yili shunday iqtidorli yoshlardan 40 nafariga davlat granti nasib etdi. O'qishda yuqori natijalarga erishgan talabalar ikkinchi kursdan boshlab kontrakt to'lovidan ozod qilinmoqda. Ta'limda xalqaro hamkorlikning ahamiyati juda muhim. Universitet talabalari va professor-o'qituvchilari o'ndan ortiq davlatlar bilan almashinuv dasturlari orqali ta'lim olish va malaka oshirish imkoniyatiga ega. Talabalar nafaqat ilmiy va amaliy tajriba orttirishlari, balki yozgi ta'til davrida xorijda ishlab, moddiy jihatdan ham qo'llab-quvvatlanish imkoniga ega bo'ldilar. O'quv dargohimiz yetmishdan ortiq xorijiy universitetlar bilan memorandumlar imzoladi.

Iqtisodiyot, turizm, xorijiy tillar, psixologiya, maktabgacha ta'lim, pedagogika, filologiya, tarix yo'nalishlari bo'yicha talabalarga yaratilgan qulay sharoitlar, berilayotgan grant va imtiyozlar, xalqaro hamkorlik hamda zamonaviy ta'lim dasturlari yoshlarni o'ziga ohanrabodek tortmoqda. Qo'qon universitetida o'qimoq orzusida yurgan o'g'il-qizlar safi yil sayin kengaymoqda. Ushbu universitetning Andijondagi filialida ta'lim tibbiyot yo'nalishiga qaratilgani uchun ham soha talabgorlarida katta qiziqish uyg'otmoqda.

Qo'qondagi “Aziztepa” mahalla fuqarolar yig'ini hududidagi “Yangi O'zbekiston” massividagi qurilish ishlari bilan ham tanishdik. 34,2 gektar maydonda bunyod etilajak qurilish ishlarining shiddati yuqori. Ushbu massivda biznes markazi, umumta'lim maktabi, mehmonxona, savdo va ko'ngilochar markazi, institut binosi, ko'p qavatli ikkita avtoturargoh va o'rta qismida sayilgoh loyihasini ko'rib hayratlanmasdan iloj yo'q. Agar massivdagi uy-joylar va infrastruktura ob'yektlari to'liq qurilib bitkazilsa, ko'z ko'rib quvonchdan yayraydigan Qo'qon bag'ridagi yangi shaharcha dunyoga keladi. Qo'qonning fayziga yanada fayz, chiroyiga yanada chiroy qo'shiladi.

Avvallari e'tibor bermagan ekanman, Qo'qonda bor-yo'g'i bittagina to'qqiz qavatli uy bo'lgan ekan, xolos. Endilikda-chi, birgina “Yangi O'zbekiston” massivida 12 ta 16 qavatli 1 ming 308 xonadonli, 72 ta 10 qavatli 5 ming 30 xonadonli uy-joylar qad ko'taribdi.

Prezidentimiz ta'biri bilan aytganda, “xalqimiz ertaga emas, bugun yaxshi yashashi kerak”. Nazarimda, bu yerda esayotgan  shamollar ham Qo'qonga taraqqiyot, farovonlik, ezgulik olib kelayotgandek.

Qo'qonga borgan kishi xon o'rdasini ko'rmasdan qaytmaydi. O'rda atrofidagi yashillikni ko'rib, hokimning aytganlari yodimga tushdi. Bundan bir necha yil avval o'rda atrofida olti yuz tupga yaqin daraxtlar bo'lsa, bugun daraxtlar soni yetmish ming tupdan ortibdi. Bir tomonda oltiariqcha qilib yetishtirilgan uzumzor. Har tomonda sanab adog'iga yetib bo'lmaydigan manzarali daraxtlar. Dunyoning qaysidir burchagidan keltirilib parvarish qilinayotgan qimmatbaho va go'zal daraxtlarga tikilib ko'z to'ymaydi.

Toshkentga qaytish oldidan O'zbekiston faxriylarining ijtimoiy faoliyatini qo'llab-quvvatlash “Nuroniy” jamg'armasining Qo'qon shahar bo'limi hovlisida bir guruh oqsoqollar bilan suhbatda bo'ldik. Ular ham yangilanish shabbodalaridan mamnun bo'lishib: “Yaratganga shukur, yurtimiz tinch, hayotimiz farovon, Mustaqilligimiz abadiy bo'lsin, Qo'qonimiz yanada gullab-yashnayversin”, deb duo qilishdi.

Bu ezgu duolar ijobatini ko'rish barchamizga nasib etsin!

Muhammad KENJA