Daryo qah-qah otar moviy rang bilan

Muallif haqida:

Bahrom RO'ZIMUHAMMAD — 1961 yilda Xorazm viloyatining Shovot   tumanida tug'ilgan. 1983 yilda   ToshDU(hozirgi O'zMU)ning jurnalistika fakultetini bitirgan. “Tovushsiz qadam”, “Terakka yaqin   yulduz”, “Ikki nur”, “Davsaman”, “Tinch gullaydigan daraxt”, “Kunduz sarhadlari”, “Soyalar   suhbati” nomli   she'riy to'plamlari   hamda pedagogika faniga   oid “Cho'lpon —   tong yulduzi demak”   nomli risolasi nashr   qilingan. She'rlari turk, ingliz, nemis, ispan, fransuz, rus, hind, fors, turkman, qoraqalpoq   tillariga o'girilgan.

O'zbekiston   Yozuvchilar uyushmasi va   O'zbekiston Jurnalistlar uyushmasining a'zosi.

 

ORZU

 

Vaqt bolg'achasi ostida

orzu asta-asta ushalib   borar,

ushalgani sayin kattayar   odam.

 

Vaqt bolg'achasi ostida

orzu yumaloq shaklda,

shar shaklida orzu.

 

Shunday yiriklashar daqiqa   sayin,

ushalmasa — odam kichrayib-kichrayib

yo'qolib ketadi shar   soyasida.

 

* * *

Har narsaning ismi   o'ziga monand

boshga kiygizilgan toj   kabi.

Kuchukka   “Gul” deb

ism qo'ymas hech   kim.

Boshdagi fikr qorayar   ekan

tojga yuqa boshlar   bu ranglar.

Qarabsizki, uni

hech kim kiymay   qo'yar, hayiqar.

Shu bois, men uchratmadim

Gitler degan biror   bolani.

Go'dakka ism qo'yayotganda

uning boshini va   o'smoqchi bo'layotgan

fikrlarni hisobga olish   zarur.

 

TINChLIK

Dubulg'ani

gultuvak deb o'yladi

nish otayotgan urug'.

 

Oppoq orzulari ila

ko'milgan jangchining

qirmizi qonin emib ko'kardi gullar.

 

Endi o'sha gullar

va moviy osmon   oralig'ida

sukunatdan boshqa hech   narsa yo'qdir.

 

 

* * *

Kumushrang, momiq   gul tushimga kirdi,

alvon ufqdan sirg'alib   tushdi,

alvon ufqda yo'q   edi tuman.

 

Eng mayda giyohgacha

aks etdi tushimda.

Tonggacha yashadi momiq   gul…

Oh, eslab   qololmadim gulning hidini.

 

 

* * *

Oqib ketgisi keladi   toshning,

baliqlarga qo'shilib

engil,

uzoq-uzoqlarga   oqib ketgisi.

 

Daryo

qah-qah otar

moviy rang bilan

xarsang toshlar tevaragida.

 

 

ODDIY NARSALAR HAQIDA

1

Yaxshiyamki, musht tugishni

bilmas qushlar,

yo'lbars

o'ljasiga tashlansa

faqat tishlariga ishonar.

Bu bahaybat musht,

bolg'asifat musht

odamning   peshonasiga chizilgan.

 

O'sha mushtning ostida

o'yinchoqqa aylanar

o'ljasini yutayotgan yo'lbars.

 

2

Tuvakdagi gulning chehrasi

deraza ortidan

qor sovug'ini yutib,

termulgan sayin ko'ksimga   ufurar,

gulxanga,

tuvakdagi   gulxanga qo'l cho'zsam,

daqiqa sayin   muzlaydi kaftim.

 

 3

Kuchuk hursa

nega sergak tortar   yo'lovchi,

mushuk miyovlab

na'ra tortgani kabi   yo'lbars,

bu uning tovushi,

uning yashash sharoiti shunday,

unda ayb yo'q,

nafas olmoqchi bo'lib

og'zini ochsa

doim bir xil   tovush ketar dumalab:

vov-vov.

 

TERAKKA YaQIN YuLDUZ

 

Boshqa yulduzlar-la ishi   yo'q uning,

uni chorlayotir yagona   yulduz,

yulduz — daraxtsiz   kumush bir meva,

u terakniki bo'lar   bir kuni —

terak o'saversa, yulduzga   qarab.

Yarim yo'lda qolib   ketdi gujum ham,

daraxtlarning   eng darozi — terak

kun sayin o'sadi   yulduzga qarab.

Yulduz…   Mevaligin bilarmikan u,

zumrad yaproqchalar ko'kish   nuriga

chambarchas   bog'lanib oq, oppoq shu'la

yulduz siljirmikan   bir kun o'rnidan?

… “Hozir yulduz uchdi”   degan xabarga

terak ishonadi hammadan   ko'proq.

 

* * *

Baxt qushi

biroz farq qiladi   ajdodlaridan,

qayga qo'nishini aniq   bilar u.

Ana

Quyoshga tegdi kimningdir   boshi,

Quyosh sariq bulutdek   yoyilib ketdi…

(U ham parrandadir, issiq o'lkaga

uchib ketgisi kelgandir   balki,

hali tuxum qo'yib, jo'ja   ochadi).

Boshning usti qordek   oqargach

boshqa cho'qqilarga uchib   ketdi u.

 

NAFRATNI TUShUNISh

 

Qaniydi kiprigim o'qdek   otilsa,

roziman kipriksiz qolishga   hatto.

Kipriksiz   ko'zlarim ko'rar shubhasiz:

kimdir yiqiladi ko'ksin   changallab,

kulishga ulgurmas yiqilayotib.

 

* * *

Do'stim ham daraxt,

u menga suyanmoqchi,

daraxt daraxtga suyanarmi   axir?

Men suyanchiq emasman,

suyashdan-da muhim vazifalar   bor:

sarg'ayaman, deydi   ko'k yaproq,

shamol esa uni   olib ketmoqchi,

sarg'ayma, deyishim kerakdir   unga,

kuz kelguncha sabr   qilsin u.

Endi ildizlarning tashvishi:

bittasi chirimoqchi shu   paytda

qishgacha shoshmang, deyman,

yaproqlar to'kilsin,

qushlar uyasini tark   etsin.

Mevaga tushayotgan qurtlarni

kechqurun   muzokaraga chaqirdim.

Kavagimga uya qurmoqchi   bo'lgan ilonga

bahorda har kuni   yalindim —

undan qo'rqadi-da oppoq   gullarim.

O'z tashvishim ildizdek   chulg'ar,

menga yaqin kelmang, daraxtlar,

daraxt daraxtga suyanarmi   axir?!

 

 

* * *

Qor yog'moqda, xayol yog'moqda,

xayol kabi oqarar   atrof.

Otma, ovchi, butoq   ostidan

qochayotgan kulrang quyonni.

Oyoq bosilmagan oqlik. Yur, jonim,

izlarimiz yonma-yon tushsin.

Lablaringda qizil tabassum,

ne so'zlasang oq   bo'lur bugun.

Bugun tongnikidir biz   yurgan so'qmoq.

 

UChLIKLAR

 

1

Tila tilagingni deb   so'rar

baqalar bilan birga

yashaydigan oltin baliq.

 

2

Oyoq uzatgisi keldi-da   birpas

tonggacha qorbobodek

erib bitdi bo'ron.

 

3

Qo'shiqni ushlab ko'rdilar.

Qo'shiqni barmoqdan yasalgan

qafasga qamab qo'ydilar.

 

4

Derazani chil-chil sindirdi,

mahbusni   ergashtirib ketdi iziga

chechaklarning   isyonkor hidi.

 

5

Uchayapti qanotli nina.

Yashil ko'ylak tikib   ber, ninachi,

keyin moviy ko'ylak.

 

6

Cho'ntagida pullar

uzoq mehmon bo'lmas.

Cho'ntagida shamol yashaydi.

 

7

Zulmat qo'ynida Oq   kema.

Goh qon tusida,

goh sut tusida   chayqalar dengiz.

 

 

TABASSUM UChUN SO'NGGI IMKON

 

1

Ruxsat bering

bir zum   boshsiz   yashay,

telpakdek olib qo'yay   boshni,

ko'zlarni   ko'zoynakdek yechib qo'yay   birpas.

Ruxsat bering

bir marta

qo'rqinchli   tushlarning barini

boshning o'zi ko'rsin   javon ustida.

 

2

Shov- shuv

quyuq, kulrang tuman,

uning dumi, uzun bir dum.

Qayga qadam qo'ysa-da

otning yolidek

chehrasini sassiz chulg'ab   oladi.

Endi ajratib ko'ring-chi

chehra va ko'zlarni   kulrang tumandan.

 

3

Kaft, kitob ushlab charchama,

umrdek uzun vagon   ichida.

Bu yerda

soatlab

o'qish   mumkin peshonalarni.

 

4

Iltimos   tashiydigan telefon –

simli,

bir-biriga   ulangan hammollar safi.

Burnidan narini ko'rolmaydiganlar

ovozi o'rnashib qolgan   oq quti…

Har uyda

shunday quti, shunday suhbatdosh.

Ikkita qo'ldan

ko'proq ish bajarar

telefonning bitta   dastagi.

 

5

G'alati istak:

xuddi yarani ko'rgandek

ko'rmoqchiman

qay shaklda bo'larkan   og'riq?

Vujud shovqinlarni yengadi,

jimlikka qaytadi vujud,

ko'zlar qarar og'riq   keladigan yo'lga.

Hatto tish og'rig'i   shovqinni kutib

birzum izga qaytar   ko'zga ko'rinmay.

 

6

Mana, uy ham qarib   qoldi,

izg'irinni nazarga ilmasdi   avval,

ko'ziga bo'rondek ko'rinar   endi

bahorda yashaydigan shabada.

 

Eh, nimalarni   ko'rmadi uy —

chivinni-da haydamay

o'zida yashatadigan to'rt   devor…

Uy eshikka suyandi,

yoqimsiz g'iyqillab ochildi   eshik.

 

7

Maymunni tomosha qilishdi,

tuxum yorgan

yap-yangi jo'jaga

qiziqsinib   qaragan kabi.

Maymunni tomosha qildi   odamlar,

maymun — odamlarni.

Uning qo'li toza,

tarix kitoblarini varaqlab

hech kim shu   paytgacha o'qimagan-ku

shaharni portlatgan maymun haqida.

Panjaradagi maymun

shu qadar soddaki

gunohini so'rab

da'vo qilib bormas   mahkamalarga.

 

8

Labni, labdagi qonni

yashiradigan achchiq tabassum.

Yiqilib tushgan odam

o'zini o'nglab

qad-qomatini   tiklaganidek

xo'rsiniqdan tabassumga

qaytaradigan kuch.

 

* * *

Tishni   tishga bosib,

sal o'tgach

burunni iyakka tegizib

saqlangan toqat

nihoyat sabrning tagiga   yetdi.

 

* * *

Voqealarni tanlab,

bir chimdim tuz   sepib,

konserva   qutilariga joylang –

yo'lda

sudralib kelayapti keksalik.

 

 

ARChA BARGLARIDEK YaShIL

 

Umidlarim sog'lom o'ssin   deb

nafas oldim toza   havodan,

qiyoq tilli maysalar,

qushlar – qanotida osmonning   hidi,

hansirayotgan   bahaybat daraxtlar

nafasga yo'g'rilib ichimga   kirdi.

Va o'sayotgan umidlarim   osha

bir sado vulqondek   otilib chiqdi:

qanday yaxshi yashash,

ayniqsa, seni   hamma tushunsa,

hamma seni sevsa,

yuragini yuborsa ko'ksingga,

jajji

qizil   va oq   qushchalardek

suhbatlashishsa ular…

Vujudimni qopladi

birdan   to'lqinsimon hayqiriq.

Mening sevgim shunday   ediki…

Sevgining ichida yashayman,

mening sevgim abadiy,

mening sevgim archa   barglaridek

abadiy yashil.