Aylanadi ovozsiz dardlar
Zamira RO'ZIYEVA
Muallif haqida:
Zamira RO'ZIYEVA — 1957 yilda Andijon shahrida tug'ilgan.
ToshDU (hozirgi O'zMU)ning jurnalistika fakultetida tahsil olgan.
1991-1996 yillarda O'zbekiston Kasaba uyushmalari federatsiyasi muassisligidagi “Ishonch” gazetasining, 2013-2017 yillarda “Milliy tiklanish” ijtimoiy-siyosiy gazetasining Andijon viloyati muxbiri bo'lib ishlagan.
Shoiraning “Munavvar yurtim”, “Gul islari”, “Atirgulga aylanaman”, “Oftobjamol”, “Jon rishtasi”, “Sarchashma”, “Tashnadil”, “Umid bog'i”, “Ro'shnolik”, “Hayratning suvrati” kabi o'ndan ortiq kitoblari nashr etilgan.
Bundan tashqari, O'zbekiston Yozuvchilar uyushmasi tashabbusi bilan chiqarilgan “Kim edig-u kim bo'ldik?”, “Avlodlar yo'li”, “Ming bir ibratli hayot”, “Bugunning nafasi”, “Ulug' saltanat vasfi” nomli to'plamlarida publitsistik ocherklari chop etilgan.
Bolalar uchun “Ziynatbog'”, “Halinchagim, onamdayin aziz yurt” nomli kitoblar muallifi.
“Oltin qalam” milliy mukofoti sohibasi. 2015 yili “Shuhrat” medali bilan, 2022 yilda Xalqaro Bobur mukofoti bilan taqdirlangan.
Yaqinda qatag'on qurbonlari mavzusida “Kul bosgan cho'g'lar” nomli hujjatli qissasini yozib tugatdi.
O'zbekiston Yozuvchilar uyushmasi a'zosi.
Toza tafakkurga, hur tasavvurga,
Imonlar ilhaqdir, vijdon ilhaqdir.
Oshno bo'lolgankim ziyoga, nurga,
Jamlansa millatdir, jamlansa xalqdir.
Urchigan yolg'onga qarshi ko'ngillar,
Haqiqat yo'lida baxshi ko'ngillar,
Mardlar maydonining naqshi ko'ngillar
Jamlansa millatdir, jamlansa xalqdir.
Tobelikka qarshi dod, qaldiroqlar,
Zulmat to'fonlarin yenggan chiroqlar,
Yog'iyning adabin bergan Shiroqlar
Jamlansa millatdir, jamlansa xalqdir.
Xudbinu loqaydlik zahri “mustabid”,
Kemirgay har sichqon, tishlagay har it,
Ma'rifatsiz ERK yo'q degan har
jadid —
Jamlansa millatdir, jamlansa
xalqdir.
Men, men… degan nafsin o'tlarga otib,
Nochorning kuniga yarab, asqotib,
Kuysakim mudragan qavmin uyg'otib —
Jamlansa millatdir, jamlansa xalqdir.
Hurlik deb cho'g'lanish baxt degan jonlar,
Sog'inish, yo'qlanish baxt degan jonlar,
Vatanda uyg'onish baxt degan jonlar,
Jamlansa millatdir, jamlansa xalqdir.
* * *
Balki zaifroqman ko'rinishimdan,
Bilagim zo'rmasdir boqsang daf'atan.
Ammo bahor, yozim, kuzu qishimdan
Tinmay mehr yog'ar bag'ringga, Vatan.
To'rtov faslim ishqning libosin kiygan,
Ortda gul, daraxti yashnoq izim bor.
Vatan, dardingni ham o'zimday suygan,
Mehrin malham etgan o'g'lim, qizim bor.
Ular bizni juftlab ona Vatan der,
Ko'zlar to'la mehr, qalb to'la qadr.
Sen ham mening kabi ishonchingni ber,
Ular hamishalik himoyangdadir.
Muhabbatli vujud zaif bo'lmas hech,
Tuproqni surmalar aylab yonaman.
Kuningga yarayman deya tongmi, kech,
Qatoringga mardlar qo'ygan Onaman.
Muhtasham qo'rg'onsen, zo'rsen, buyuksen,
Olovlar sachrasin aytar so'zimdan.
Seni ko'zga ilmas g'animki qo'rqsin,
Qatoringda turgan o'g'lim, qizimdan.
* * *
Oqillar sevgisin aytib hayqirmas,
Vatanni elitmas maddohning turqi.
O'zidan avvalroq gapirgay besas,
Elkaga olingan Vatanning yuki.
Oqillar izzatu mavqe tilanib
Ko'rgan kitoblarin sonin sanamas,
Mavqe kelaverar unga elanib,
Ilmiga amali vojib bo'lsa bas.
SAKKIZLIK
Sezdim mohiyati nedir hayotning,
Bandi etdi ulug' diydor istagi.
Sezdim oshiqlikning kashfiyoti ming
Va sabru saboti… ming bir tusdagi.
Sezdim, jismu jonim ishq ichra bugun,
Qay tong kurtak yozib, qay tong gullarman.
Men turish-turmushi yashil bog' — Majnun,
Ul yorga ichikib xatlar yo'llarman.
IQROR
Endi mening tunim bedor seni o'ylab,
Kunduzlarim kashf etar sen sevgan gulni.
Charchamasman oymi, fasl va yo yillab,
Topgunimcha huzuringga borar yo'lni.
Vasl ishqi sarxush etgich gulobimdir,
Qorachig'im isming yoziq kitobimdir,
Muhabbating manim oyim, oftobimdir,
Topgunimcha huzuringga borar yo'lni.
Alamlarga sabotim bor, dardga sabrim,
Gumonlarni yorib yitgay nishu zahrim,
Buyuk diydor — buyuk istak, buyuk faxrim,
Topgunimcha huzuringga borar yo'lni.
Ko'zni yumsam ko'ngil ko'zi ko'rgay seni,
Sevdim jismu joni fido qulday seni,
Nisor etgum oromlarning hammasini,
Topgunimcha huzuringga borar yo'lni.
* * *
Iztiroblar qiynar kuygan yuragimni,
Dunyo, sening tarozingni qiyshiq ko'rdim.
Bilmay qoldim qaysi yo'ldan yurmagimni,
O'ngda riyo, chapda yolg'on-yashiq ko'rdim.
Dasti uzun, makri ming tuski ayyorlar,
Har soddaga har lahza pand berib yashar.
Muhabbati arzongarov, yolg'on yorlar
Xiyonatning tiliga qand berib yashar.
Ishq deganlar uzun-uzun dardga ega,
Kesakdillar hiringlashib icharlar may.
Nafisa dil toshbag'irni sevdi… nega?
So'rab ezgin ohanglarda yig'ladi nay.
Donishfikr xokisorga poygak tegib,
Uy to'rida o'tiradi maddohlar xush.
Kir panjada haqiqatning boshin egib,
Kimdir “osmon qo'limda” deb yuradi xush.
Dunyo bir kam deb aytdilar,
Rostmidi yo,
Bormi sening bu kamlikdan ezilganing?
Berarmisan savolimga javob, dunyo,
Bilarmisan tarozingning buzilganin.
* * *
Boshqacharoq o'yla, boshqacha yasha,
O'qiy bil yuz yillik moziy satrini.
Bo'y-basting ko'rinsin kunga yarasha,
Ko'tar ko'ksingdagi hurlik qadrini.
Aldanish gumrohlik, adashish gunoh,
Yo'l izla o'gitlar o'chmagan xatdan.
Ana, maysa guvoh, ana, gul guvoh,
Suyangisi kelib jilmaydi Vatan.
Yuraging himoya haddin ushlasin,
Kelib yetdi hushyor yashash xonasi.
Mudrama, kaftingdan qulab tushmasin,
Ravzayi jannatning taklifnomasi.
O'z rizqingni o'zing shukur qilib ye,
Gung turmagin baxtdan bahs
boshlangan payt.
Yurt, elim hech kimga qaram emas de,
Qaram bo'lmaydi de, men borman, deb ayt.
“KAFANSIZ KO'MILGANLAR”NI O'QIB…
Kimning bolasisan, Qanoat,
Ayt seni kim tuqqan, Iroda.
Elkangdagi kunlar shuncha zax,
Elkangdagi kunlar g'amboda.
Tikanli, chirigan arqon yo'lingmi?!
Qontalash tovoning izlarin ko'rdim.
Senga qo'llarini cho'zgan o'limmi?!
U arqonga buncha yonma-yon yurdi.
Bugun keng dunyo lol,
Bag'rin qarichlab,
Ming bor o'lchab yig'lar o'z oyoq-boshin.
Qaerga qo'yadi endi…
Joy tor-ku,
Yarador yuraklar ko'targan toshin.
HOLAT
To'lg'in ko'nglim ko'rinishi — kuz,
Aytarlarim cho'g'langan barglar.
Bir hikoya aylanar beso'z,
Aylanadi ovozsiz dardlar.
Shamollarda vazmin bir navo,
Oqil dunyo chayqaladi jim.
Yuzlarimni o'par nam havo,
To'kila qol, to'kil, ey, ko'nglim…
ONAM BILAN SUHBAT
— Sizdan keyin bildim, ona,
Hayot shunday qattiqqo'l.
— Sen sabr top, sabr yana,
Mening asl bolam bo'l.
— Yuragim katta edi,
Ig'vo, g'iybatlar yedi.
— Bular ham bitta sinov,
Yiqilma, bolam, darrov.
— To'xtama deb aytgandingiz,
Yurgizmaydi chohlar ko'p.
— Sen o'zingda g'oliblik sez,
Matonatning qo'lin o'p.
— Nogoh kelgan nayzalarga
To'ldi orqa kuragim.
— Ko'z oldingda tursin, bolam,
Mening daryo yuragim.
— Yaqinimning xiyonati
Aylamoq istar mayib.
— Tishni tishga bosib… yutin,
Mag'rur qara… jilmayib…
— Tun bag'rini qiynab qo'ydi,
Ona, ko'zdagi jolam.
— Bas, yig'lama, jonim kuydi,
Tilovat boshla, bolam.
ChIMILDIQ
Momomdan qolgan palak
devoringmi, chimildiq?
Sevib, sevilgan malak
Dildoringmi, chimildiq?
Sen eng ulug', muhtasham,
Go'sha bo'lding muhtaram,
So'zlab turar par to'shak
Chiroyingni, chimildiq.
Qutlug' uyning burchagin
Shunchalar sehrlaysan.
Sen Xizr bobo bergan
Benazir mehrdaysan.
Harir libos jononning,
Jononni suygan jonning
Yuragiga gulxanlar,
Gulzorlar muhrlaysan.
Bog' aylangan gulnafas
Xayolmisan, chimildiq?
Nigohi, nuri nafis
Hilolmisan, chimildiq?
Orzumisan oshiqqa,
Mavzumisan qo'shiqqa,
Begona ko'z tushmagan
Visolmisan, chimildiq?
Toza hislar, tuyg'ular
G'unchalasin, gullasin.
Guvoh bo'lsin parqular,
Arshga salom yo'llasin.
Sadoqatni saqlagin,
Orzularin oqlagin,
Ko'ngillarni qovushtir,
Parvardigor qo'llasin.