Ko'chayotgan yulduz misoli, zir aylanar ruhim va jismim…

Safar OMON

 

Muallif haqida:

Safar Omon (Omonqulov) — 1957   yilda   Boysun tumanida   tug'ilgan. Hozirgi O'zbekis­ton   Milliy universiteti (avvalgi ToshDU)ning jurnalistika fakultetini 1983   yili tugatgan.   Shoirning “Laylatulqadr” (“Yozuvchi” nashriyoti, 1994 yil), “Shamsul qalb” (G'.G'ulom nomidagi Adabiyot va san'at   nashriyoti, 2002 yil), “Ishq” (“Yangi asr avlodi” nashriyoti, 2004 yil), “Alam” (“Voris” nashriyoti, 2007 yil), “Sayyo­rai   safar” (“Mumtoz so'z” nashriyoti, 2013 yil), “Shukrona” (“Tafakkur” nashriyoti, 2018 yil) kabi   she'riy kitoblari nashr etilgan.

O'zbekiston   Yozuvchilar uyushmasi va O'zbekis­ton Jurnalistlar uyushmasi a'zosi.

 

             MENI   SURXONDAN   IZLANGIZ

Do'stlar meni sog'insangiz, go'zal Surxondan izlangiz,

Ajab Surxon ne dersangiz,   jumla jahondan izlangiz.

Bu zaminning qatlariga   ne bir tarix imlo   o'lgay,

Kim o'zligin bilmoq ersa, ani pinhondan izlangiz.

 

Kulli bashar beshigini   ilk tebratgan ulug'   yurt bu,

Eron zamin, Turon zamin   bo'lgan imkondan izlangiz.

U budparast, u   zardo'shtdir, u nasroniy, u   islomdir,

Ming bir nomli lomakondir, ani Qur'ondan izlangiz.

 

Turfa ranglar, turfa   jilva, bu Turon   barchaga sheva,

Jam bo'lgandek zarrin teva, jannat makondan izlangiz.

 

Ulug'bekning   ko'zlarini, bobolarning unlarini,

Nun va alif,   mimlarini ushbu osmondan izlangiz.

Mulki Turon ne nom   erdi, anda kimga in'om   erdi,

Madinadan xabar berdi,   ani Usmondan izlangiz.

 

Ne moziyki o'ylagayman,   Safar, mag'rur kuylagayman,

Do'stlar meni sog'insangiz, go'zal Surxondan izlangiz.

 

                BU   JONIMDA   GULOB O'QI

Agar sendan savol bo'lsa, bu jonimdan javob   o'qi,

Hiyla ko'nglingga ma'qulki,   do'stim, yana savob o'qi.

 

Tug'ilgandan men   istaram javob jonimning qasdig'a,

Hijron otashida bilki, laxcha- laxcha kabob   o'qi.

 

Sening sahni zamoningda   na masrur o'ldiki, na   shod,

Eslab yana u   kunlarni   raftorimdan shitob   o'qi.

 

Kuyib vaslingda kutgayman   visolingga yetishmoqni,

Sog'inch daryosida oqgay   bu ko'zlardan selob o'qi.

 

Mehrob deb boshimni qo'ydim poyingdan tushgan zarraga,

Jilla shodlik topsang agar, bu jonimda gulob o'qi.

 

Baridan kech, arzimasdir bu go'zalning tirnog'iga,

G'am- anduhni   qo'ygil endi, ko'zlarimdan kitob   o'qi.

 

Bilmasmanki, yozug'ida neki jannat, neki do'zax,

Safar, yorning og'ushida ozod qulsan shitob o'qi.

 

NAQShBANDIY HAZRATLARIGA

Ortimga qarayman, kulluhum so'roq,

Oldimga qarayman, kulluhum savol.

Suvratim, siyratda ne muncha zavol?

Olomon, bu sirga javob   ber, javob?!

 

Osmonga qarayman, kulluhum   so'roq,

Poyimga qarayman, kulluhum savol.

 

Bu ne tanazzulu   bu ne bir kamol,

Ey, osiy olomon   javob ber, javob?!

 

Qo'llarim   so'roqdir, yo'llarim so'roq,

Uylarim savoldir, o'ylarim savol,

Karvonim   hiloldir, sarbonim- malol,

Arosat bandasi javob   ne, javob?!

 

Kalima qaytardim, astahfirulloh,

Sen ne payg'ambarsan, ne Rasululloh,

Arosat bandasi na   bashar, illoh,

Kulluhum   savolsan, kulluhum gunoh.

 

Alhamdulillohki, keldi bir javob,

Xo'ja Bahovuddin, So'fidan   tavof:

“Oxirat ummati sensan,   bissavob,

Savol o'zingdadir, o'zingda   javob”

 

                  SILSILA

O'g'lim   BEDILga

Ko'chayotgan yulduz misoli,

Zir aylanar ruhim va jismim.

Bu rindona hayot   sahnida,

Unutaman, Enajon, ismim.

 

Sahrodagi qum barxanlari,

Bu noma'lum shoirlar   qabri!

Samon yo'lda   chaqnagan nurlar,

Darveshlarning bardoshi, sabri!

 

O'tgan avlod o'taverarkan,

Yo'qolmaskan   ongning shevasi.

O'rkach- o'rkach   tog'lar aslida,

Ilhomimning karvon- tevasi.

 

Cho'qqilardan   qulagan toshdek,

Ming bo'lakka bo'linar jismim.

Qayga bormay kutib   olar jim,

Otameros qutlug' makonim.

 

Sharqdan G'arbga, Janubdan   Shimol,

Darveshlarning   lashkari to'zgan,

Chor tarafda shayx, avliyolar –

Kubro, Rumiy bayrog'in yozgan!

Ko'chayotgan   yulduz misoli,

Zir aylanar ruhim va   jismim.

Bu rindona hayot sahnida,

Unutaman, Enajon, ISMIM!

 

ILTIJO   YoKI   LAYIN KASALLIGI

O'g'lim ULUG'BEKka

Bobomeros kasbni tanlading   o'g'lim,

Hayotdan   rozimiz, yo'qdir   ginamiz.

Hali ming- ming yillab inson dardiga,

Malham bo'laverar ibn   Sinomiz!

 

O'ngimda ulg'ayding,   zukko, iymonli,

Gard yuqmay yurakka misli   loladek,

Yoshu martabaning bizga farqi yo'q,

Sen hamon biz   uchun go'dak boladek…

 

Chechagu o'latu vabo, maxovni,

Tib ilmi dunyodan surib tashladi.

Endi inson uchun   yuragu buyrak,

Hatto kallani ham qo'yib boshladi.

 

Beg'ubor qalbingga   tushmasin titroq,

Hanuz ko'p narsalar kelgaydir malol.

Xudoning dardiga davo ko'p deymiz,

Nega bedavolar avj oldi, savol?

 

Bugun ko'paymoqda layin kasallik—

Hasadu g'arazu fitnayu   shubha,

Mansab, boylik desa   hech ikkilanmay,

Hatto nomusini qiladi   tuhfa.

 

O'zidan   o'zgani   o'ylamas   hech ham,

Mana shu kasalga ko'pchilik hayron.

Maqsadi yo'liga g'ov   bo'lsa birov,

Illoh, Makkani   ham qiladi   vayron.

 

Shifokor, tabiblar – Sinozodalar,

Dunyo o'zgardimi, yoki havosi?!

Nahotki, shaytoni   layin   kasalin,

Bo'lmasa   malhami yoki davosi?

 

Bu illat, bu ofat,   oxir- oqibat,

Olib kelmasaydi   qirg'inbarotga.

Sinchiklab tekshirgin, to'g'ri tashxis qo'y,

Nima bo'lgan o'zi   bu ODAMZOTga!

 

             ChILLA   XAT

Qahri sindi chillaning, Ena,

Qantar og'di, qor   turmas endi,

Nega ko'nglim   muzlaydi yana,

Nega ko'ngil bo'zlaydi, Ena.

 

Ayvonimni qor bosdi, Ena,

G'ururimni yor bosdi, Ena,

Bu go'shadan ketayin   desam,

Qarorimni or bosdi, Ena.

 

Tarnovlarda muz sindi, Ena,

Tashvishlardan ko'z tindi, Ena,

Hasad, g'araz mahallasida,

G'urbatlarga so'z ko'ndi, Ena.

 

So'zga og'ir bo'ldi-ey,   Ena,

Haq so'z sag'ir   bo'ldi-ey, Ena,

Lafz deganda qolmadi   turum,

Qasam yag'ir bo'ldi-ey, Ena.

 

Qahri sindi chillaning, Ena,

Qantar og'di qor   turmas endi.

Nega ko'nglim muzlaydi   yana,

Nega ko'ngil bo'zlaydi, Ena!

 

               RUBOIYLAR

 

                                1

Ulug'im , ulusim, ey   turkiy tilim,

Ko'z nurim, madorim, oyog'im, qo'lim.

Tojimsan, taxtimsan   va o'ngu so'lim,

Zakiy bo'l, boqiy bo'l,   avlodim, Tilim!

                                 2

Kubroning dastida   qolgan bayroqdan,

Sulaymon bastida   bo'lgan tayoqdan,

Senga bir suqtumor   bitsam Vatanim,

Boburning   bag'ridan tomgan siyohdan.

                                3

Hubbul Vatan minal   iymona,

Qachon to'lar bilmam   paymona,

Shaydo bo'lmay hukmi   shaytona,

Jon fido qil, borki   imkona.

                                4

Nurlar mening narvonim deding,

Kunlar mening qurbonim deding,

Na kunlaru na   narvon   yetar,

Qani mening imkonim deding.

                               5

Mo'minga yetmasa sening ozoring,

Hech kasod bo'lmagay ko'ngil bozoring,

Obodu ozod et,   ongu nazaring,

Chechaklar burkagay shunda mozoring.

                                6

Joningni o'ylama,   o'ylovchilar bor,

Qilmishing   so'ylama, so'ylovchilar bor,

Farzu     sunnatingni unutma, ey Do'st,

Oxirat kunida siylovchilar   bor.

                               7

Marhumlar sening   noninga zormas,

Hashamu dabdaba, sha'ningga   zormas,

Duodan yo'qlagil,   ey osiy banda,

Oxirat ayvoni bilki bozormas.

                               8

Madina — ko'ngildir,   Makka – pok niyat,

Hammasin Allohim qilgan   inoyat,

Haji kabiradir asli   hidoyat,

Iymon Ka'ba bo'lsa, Islom — saodat!

                               9

Jumlai mo'minlar qilar bir nido,

Kunu tun o'zingga   aylab iltijo,

Turkiston pirlari   yotgan makonni,

To   abad tinch saqla, ey qodir Xudo!

                              10

Ey Do'st,   barqaror   qil   imkonimizni,

E'tiqod atalmish   ummonimizni,

Ramazon tongidek   pok   ayla doim,

So'nggi nafasgacha   iymonimizni.

                               11

Iso Termiziyga beshik bo'lgan kent,

Va   yetti iqlimga   eshik bo'lgan kent,

Bug'da   tug'ulgan bir go'dak   hurmati,

Hadisi sharifda beshak   bo'lgan kent.

12

Samandar qushini boshiga qo'ygan,

O'n   ikki yulduzni ko'ksiga   o'ygan,

Bir elu bir   yurt bor dunyoda yakto,

Barchani farzand deb   onadek suygan.

                                13

Ka'ba deb ko'ngilni   men qildim tavof,

Elimning duosin ayla   mustajob,

Men ojiz, men   osiy, gunohkor banda,

Degayman: vallohu a'lam bissavob.

                                14

Olmos tarozida barini   torting,

Barcha gunohimni bo'ynimga   orting,

Umrim davomida bir   savob bo'lsa,

Eng avval, enamga,   enamga torting.

                               15

Sharqdan   shamol essa sabo bo'larmish,

G'arbdan   shamol tursa   vabo bo'larmish,

Hazrati Rumiyning   buyuk   hikmati,

Bugun   ham   o'ngingda   bajo bo'larmish.

                                 16

Ey Do'st,   gunohimni   maxfirat qilgil,

So'nggi nafasgacha   ma'rifat   qilgil,

Mehnat ibodatdir degan va'dang bor,

Mehnatni bisyoru   dardni   rohat qil.

                                17

Makonu zamoni bir fikr   qilg'il,

Sadoqat tongida sen   zikir qilg'il,

Tiriklik,   to'kinlik uchun har kuni,

Tangriga ming bora sen shukur qilg'il.

                               18

Bandaga   berilgan imkoniyatni,

Ming bitta imtiyoz   va inoyatni,

Buning ma'nisi shu: foniy dunyoda

Sinovdan   o'tkazish   insoniyatni.

                               19

Ramazon ne deding?   Muxtasar javob:

Tavba- tazarrula   o'tkazgan tunlar,

Tangrining va'dasi birga ming savob,

Do'zaxning eshigi yopilgan kunlar.

20

Dedim: Buncha baland nega   bu tog'lar?

Dedi:   E'tiqodda sobitligidan.

Dedim:   Bunday go'zal jannatiy bog'lar?

Dedi:   Xalqning yurtga   sodiqligidan.

                                21

Qaniydi Allohim etsa   inoyat,

Borib ko'rolsaydim men   Mushtariyni.

Ul ajam   mulkini   aylab sayohat,

Ziyorat qilsaydim Zamahshariyni.

                                22

Jahongirlar yurtidir bu, avliyolar makoni,

Etti iqlimga jo bo'lgan mo''jizayu imkoni,

Bilki boqiy yangragaydir dinu imkon farmoni,

To   oxirat Haq, Adolat, erur aning Hoqoni.

                                23

Oy va yillar   erur abadiy mezbon,

Kelib   ketmoqlikdir hayotiy mezon.

Tiriklik farzlari   aslida avzon,

Haddini bilmog'i   kerakdir Mehmon.

                               24

Iymonning doyasi sabur va shukur,

Iymonsiz g'oyasi g'araz   va kufur.

Insofdan tug'ular elga   manfaat,

Irfonu ma'rifat   va sog'lom fikr.

                              25

Ey, baxt   qushi,   qo'nma boshimga,

Bugun baxtdan sarmastman   o'zim.

Ey, g'am qushi   kelma qoshimga,

Ikkisiga   sarbastman o'zim.

                             26

Oromgohda kelsa boshimga,

Saboq bo'lsin Inson   nasliga.

Orom topsam, qabr   toshimga

Yozingiz: “Aslidan asliga!”

                                        2019-2022   yillar.