Qizilqumlik bunyodkorlar

Avgust oyining ikkinchi yakshanbasi —

O'zbekiston Respublikasi qurilish sohasi

xodimlari kuni

Jonajon O'zbekistonimizning yangi qiyofasini barpo etayotgan quruvchilar xalqimizning hayot sifati va darajasini oshirishga bevosita xizmat qilmoqda. Bu boradagi ezgu ishlari haqida so'z borar ekan, ishlab chiqarish va ijtimoiy infratuzilma ob'yektlari, uy-joy, turli bino va inshootlar, savdo shaxobchalari, ta'lim, tibbiyot va madaniyat muassasalari, istirohat bog'lari va xiyobonlar, favvoralar, bolalar maydonchalari va sport maskanlari jadal sur'atlar bilan bunyod etilayotganini mamnuniyat bilan ta'kidlash lozim.

“Navoiy kon-metallurgiya kombinati” aksiyadorlik jamiyatining ishlab chiqarish ko'rsatkichlarini oshirishni yangi sanoat ob'yektlarini qurish va kengaytirish, modernizatsiya qilish ishlarisiz tasavvur qilib bo'lmaydi. Bu vazifalar birinchi nav­batda kombinat quruvchilari zimmasiga yuklatilgan. Ta'kidlash joizki, kombinat tashkil topgandan buyon o'tgan 65 yil korxona uchun jadal rivojlanish davri bo'ldi. Korxona mehnatkashlari, shu jumladan, quruvchilarining mehnatsevarligi, fidoyiligi va matonatlari evaziga asriy sahroda shaharlar barpo etildi, uning bag'ridagi boyliklar xalqimizga xizmat qilmoqda.

Kombinat qurilish majmuasi korxona rivojlanish bosqichlarida salmoqli o'rin tutib kelayapti. Bugungi kunda rivojlangan infratuzilmaga ega bu ulkan majmua bir-biridan yuzlab kilometr uzoqlikda joylashgan, Navoiy, Buxoro, Samarqand, Jizzax, Surxondaryo viloyatlari va Qoraqalpog'iston Respublikasida barpo etilgan yirik ob'yektlarni o'zida mujassam etgan. Respublikamiz mustaqilligi davrida kombinat tomonidan qurib bitkazilib foydalanishga topshirilgan 3,4,5,6,7-gid­rometallurgiya zavodlari, Qizilqum fosfarit kombinati, “Muruntov” konidagi KNK-270 tik qiya konveyeri, “Zarmitan”, “Qoraqo'ton”, “Aristantov”, “Meylisay”, “Shimoliy Konimex”, “Sugrali” konlari, Qo'ng'irot soda zavodi, “Navoiy” EIZ, shuning­dek, Navoiy xalqaro aeroporti, Navoiy davlat konchilik ins­tituti, Zomindagi “NKMK” sanatoriysi, “Nurobod” sanatoriy-profilaktoriyasi va boshqa ishlab chiqarish hamda ijtimoiy ob'yektlarni shular sirasiga kiritish mumkin.

— Quruvchilari oldidagi eng asosiy vazifa O'zbekiston Respublikasi Prezidentining 2017 yil 1 martdagi PQ–2806-sonli qaroriga muvofiq amalga oshirilayotgan 27 ta investitsiya lo­yihasini muddatidan oldin 2025 yilgacha to'liq foydalanishga topshirish va 2025 yildan korxonada qimmatbaho metallar ishlab chiqarishni 30 foizga o'sishini ta'minlashdan iboratdir, – dedi “NKMK” AJ Kapital qurilish boshqarmasi boshlig'i Mirzaboy Alkarov. – Ana shu ezgu maqsadlarni ro'yobga chiqarish uchun zarur chora-tadbirlar ishlab chiqilgan. 2023 yilda kombinat Investitsiya das­turi doirasida jami qiymati 513,5 million AQSh dollarlik 12 ta investitsiya lo­yiha amalga oshirilmoqda, shundan 155,8 mln. AQSh dollari qurilish-montaj ishlariga to'g'ri keladi. Joriy yilning yanvar-iyun oylarida 255 million dollar kapital qo'yilmalar o'zlashtirildi va “Pis­tali” koni negizida 6-gidrometallurgiya zavodining 1-tegirmon bloki, kon sanoat ob'yektlarini elektr energiyasi bilan ta'minlash, Nurota hududida va “Pistali” konida tashqi elektr energiyasining tarmoq inshootlarini qurish va rekonstruksiya qilish singari 3 ta loyiha foydalanishga topshirildi. Yil yakunigacha 6-gidrometallurgiya zavodini to'liq ishga tushirish bo'­yicha keng ko'lamli ishlar olib borilmoqda. Zavod to'liq quvvatda foydalanishga topshirilgach, bu yerda yiliga 4 mln.tonna ma'dan qayta ishlanadi va 2100 ta yangi ish o'rinlari yaratiladi.

Bundan tashqari, Investitsiya das­turi doirasida “Muruntov” konining 5-bosqichi, “Balpantov” va “Tomdibuloq” konlari negizida qazib olish karyerlarni qurish”, “Turbay” konlarini o'zlashtirish uchun qazib olish va qayta ishlash quvvatlarini kengaytirish”, “Zarmitan” konining quyi gorizontlarini o'zlashtirish”, “Amudaryo-Zarafshon suv quvurining 3-liniyasini qurish va nasos stansiyalarini rekons­truksiya qilish”, “Chuqurquduq koni zaxiralarini qazib olish” loyihalari bo'yicha ham yumushlar rejaga muvofiq davom ettirilmoqda.

“Turbay” konlarini o'zlashtirish uchun qazib olish va qayta ishlash quvvatlarini   kengaytirish” loyihasi doirasida joriy yilning may oyida “Turbay” konidan 5-GMZga ma'danlarni tashish uchun uzunligi 45,3 km bo'lgan temir yo'l qurib foydalanishga topshirildi.

Bu ulug'vor ishlarni amalga oshirishda kombinatning Zarafshon qurilish boshqarmasi, Kapital qurilish boshqarmasi, tarkibiy bo'linmalarning kapital qurilish bo'limlari, Investitsiyalar boshqarmasi, Markaziy loyiha byurosi, Moddiy-texnika ta'minoti boshqarmalari jamoalari ham qizg'in faoliyat ko'rsatib, qurilish ob'yektlarining belgilangan muddatda foydalanishga topshirilishida arzigulik hissa qo'shmoqdalar. Bunyodkorlik ishlarida quruvchilar bilan bir safda turgan kombinat transportchilari, mexaniklari, energetiklari, konchilari, texnologlari, iqtisod sohasi xodimlarining ham munosib xizmatlari bo'layapti.

Bunyodkorlik haqida so'z borganda, kelajak avlodning ma'naviy salohiyatini oshirishga xizmat qilishi ko'zda tutilgan inshootlar haqida ham to'xtalib o'tish o'rinlidir. Bunda Zarafshon qurilish boshqarmasi jamoasining shijoatli mehnati natijasida Tomdi tumanida 504 o'quv o'rinli maxsus maktab-internat hamda Qiziltepa tumani “To'dako'l” dam olish bazasi hududida 100 o'rinli Xalqaro shaxmat maktabi qurilishi nihoyasiga yetkazilmoqda.

Boshqarmaning 4-sonli avtobazasida 80dan ortiq, turli xil rusumdagi mashina va mexanizmlari “Pistali” konida oltin tarkibli ma'danlarni qazib olish va qayta ishlash majmuasi qurilishiga jalb qilingan. Temir-beton mahsulotlari zavodida ishlab chiqarilgan yuqori markali beton mahsulotlari, armatura buyumlari, metallkonstruksiyalari, duradgorlik va PFX profil mahsulotlari ishlab chiqarilib, zavod qurilishidagi ob'yeklariga o'z vaqtida yetkazilib berilmoqda.

— Qurilish boshqarmasi tarkibidagi “Navoiy”, “Zarafshon”, “Zarmitan” qurilish-montaj boshqarmalari, “Sanoatelektrmontaj” montaj-qurilish tresti, 4-sonli avtobaza, Ishlab chiqarish-texnik butlash boshqarmasi jamoalarida ikki ming yetti yuz nafardan ortiq malakali ishchilar, muhandis-texnik xodimlar, mutaxassislar jonbozlik ko'rsatib mehnat qilishyapti, — dedi Zarafshon qurilish boshqarmasi boshlig'i Ali Eshonqulov. — Jamoamizning mashaqqatli mehnati evaziga boshqarma yillik rejalarni ortig'i bilan bajaryapti. Jumladan, bir trillion so'mlik qurilish montaj ishlari bajarildi.

O'zlarining kasb bayramlarini nishonlashga taraddudlanayotgan kombinat quruvchilari halol va fidokorona mehnatlari bilan korxona tarixida shonli sahifalarni yaratmoqda deb bemalol aytish mumkin. Negaki, buning uchun kombinat qurilish majmuasida kuch va imkoniyatlar, texnika vositalari, xomashyo va materiallar yetarli. Eng muhimi, sohada o'z kasbining ustalari bo'lgan yetuk mutaxassislar mehnat qilishayapti.

Azamat ZARIPOV,

jurnalist